Ի՞նչ սոցիոլոգիական հարցումներ է ստանում Նիկոլ Փաշինյանը, որ սեփական ժողովրդին պատերազմով է սպառնում։ Ինչքա՞ն վատ պետք է լինի որեւէ քաղաքական ուժի վիճակ, որ դիմի նման ծայրահեղ քայլի․ այսօր խորհրդարանական ճեպազրույցների ժամանակ իր խոսքի նախաբանում ասաց «Հայաստան» խմբակցության պատգամավոր Քրիստինե Վարդանյանը։
Ընդդիմադիր պատգամավորը նաեւ տարակուսեց իշխանական շրջանակների այն հայտարարությունների առումով, որ Հայաստանի դեմ հիբրիդային պատերազմի կոնկրետ դեպք ունեն․ «Եթե հիբրիդային պատերազմի կոնկրետ դեպք ունեք, «ինքնիշխաններ, ինչո՞ւ եք վախենում տալ այն պետության անունը, որից գալիս է սպառնալիքը։ Իսկ միգուցե չեք ասում, որ գնաք Մոսկվա մի բան ասեք, Բրյուսելում ա՞յլ բան։ Մի վախեցեք, մի վախեցեք, այդքան սարսափելի չէ՝ ասեք՝ Ռուսաստան, Ռուսաստան, եթե այդտեղից սպառնալիք կա»։
Ներքաղաքական դիսկուրսին եւ առաջիկա ընտրություններին վերաբերվող հարցերի մասին էլ Քրիստինե Վարդանյանն ասաց՝ դիմելով իշխանությանը․ «Կողմնորոշվեք, վերջը, մենք ընտրական շեմը չե՞նք հաղթահարելո՞ւ, թե՞ «Գյումրի 2» ենք անելու»։
Լրագրողներից մեկը հետաքրքրվեց՝ «Հայաստան» խմբակցության պատգամավոր Գառնիկ Դանիելյանը հայտարարել էր, որ իրենք էլ ունեն սոցհարցումներ, ի՞նչ է պատճառը, որ դրանք չեն հրապարակվում, եթե այդքան բարեհաջող են արդյունքները։
Կարդացեք նաև
«Քաղաքական ուժն իր համար է հարցումներ իրականացնել՝ տեսնելու համար՝ ո՞ր նարատիվները ի՞նչ ուղղությամբ են աշխատում, եւ ինչի՞ վրա պետք է ավելի լավ աշխատել։ Բայց մի քանի տվյալ կհրապարակեմ այդ հարցումներից․ ըստ այդ հարցումների՝ Նիկոլ Փաշինյանը մեծամասնություն չունի, ընդդիմադիրները միասին ավելի շատ ձայներ ունեն, քան Նիկոլ Փաշինյանը»։
Ընդդիմադիր դաշտում փոխադարձ քննադատությունների, ՀՅԴ-ին եւ Ռոբերտ Քոչարյանին թիրախավորելու մասին հարցին էլ Քրիստինե Վարդանյանը պատասխանեց․ «Քննադատության նկատմամբ մենք տոլերանտ ենք եւ երբ հարկ ենք համարում՝ պատասխանում ենք՝ առանց մարդկանց ոջիլ անվանելու, ԱԱԾ նկուղները լցնելու»։ Նա վերահաստատեց դաշինքի դիրքորոշումը՝ ընդդիմադիրներն իրենց համար թիրախ չեն, իրենց ուժերը կենտրոնացած են իշխող ուժի դեմ․ «Որեւէ տարօրինակ բան չկա, որ տարբեր քաղաքական ուժեր քննադատում են միմյանց, տարբեր կարծիքներ են հայտնում, դրա համար էլ տարբեր քաղաքական ուժեր ենք։ Ընդդիմադիր դաշտը մեկ ուժից բաղկացած չէ, բազմազան է, եւ քաղաքացիներին հնարավորություն է տալիս ընտրություն կատարել, ի տարբերություն իշխանական մեկ բեւեռի»։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
