«Մեզ համար անհասկանալի է՝ ինչն է պատճառը, որ որոշեցին հենց 2026 թվականի փետրվար ամսին քրեական հետապնդում հարուցեն»,- Aravot.am-ի հետ զրույցում ասաց ՀՀ նախկին ոստիկանապետ Վալերի Օսիպյանի պաշտպան Էդգար Շահումյանը։
Նրա խոսքով, եթե Վալերի Օսիպյանն ի սկզբանե առնչություն ունենար այդ դեպքի հետ, նրան ոստիկանապետի պաշտոնին չէին նշանակի․ «Մենք ուսումնասիրել ենք գործի քրոնոլոգիան․ «Մարտի 1-ի» գործի քննությունն ինտենսիվ իրականացվել է մինչև 2020 թվական, դրանից հետո լուրջ քննչական գործողություններ չեն իրականացրել։ Քրեական գործով, այսինքն, շարժ չկա, ու 2026-ին հանկարծ որոշել են հանկարծակի քրեական հետապնդում հարուցեն։ Մեզ համար էլ է անհասկանալի՝ ինչը փոխվեց, ինչը գնահատեցին։ Եթե այդ փաստական տվյալները կային, այն ժամանակից աշխատանքից կհեռացնեին ու քրեական հետապնդում կհարուցեին այն ժամանակ»։
Հիշեցնենք, որ Վալերի Օսիպյանին մեղադրանք է առաջադրվել այն բանի համար, որ նա 2005 թվականի դեկտեմբերի 23-ից մինչև 2009 թվականի դեկտեմբերի 9-ն ընկած ժամանակահատվածում, զբաղեցնելով ՀՀ ոստիկանության Երևան քաղաքի վարչության պարեկապահակակետային գնդի հրամանատարի ծառայության գծով տեղակալի պաշտոնը, 2008 թվականի մարտի 1-ին անցնելով իր պաշտոնեական լիազորությունները, ՀՀ ոստիկանության այլ պաշտոնատար անձանց հետ հանցակցությամբ կազմակերպել է իրեն ենթակա ստորաբաժանման ծառայողների կողմից բռնության և հատուկ միջոցների գործադրմամբ զուգորդված Երևան քաղաքի «Ազատության» հրապարակում նստացույց անող խաղաղ ցուցարարներին ցրելը, ապա քաղաքի կենտրոնական հատվածներում նրանց կուտակումները, հնարավոր ցույցերն ու հավաքները բացառելը, որպիսի գործողություններով նշված անձանց իրավունքներին և օրինական շահերին, ինչպես նաև հասարակության և պետության օրինական շահերին պատճառվել է էական վնաս։
«Գեթ մեկ ապացույց չկա, որ Վալերի Օսիպյանը հանձնարարել է որևէ ցուցարարի նկատմամբ բռնություն գործադրել։ Էդ էական վնասը, որ նշվում է մեղադրանքում, նյութական հանցակազմ է, նախ պետք է գործողություն լինի, նոր տեսնենք՝ վնաս կա՞, թե՞ չէ։ Սկսենք նրանից՝ գործողություն չկա որպես այդպիսին»,- հավելեց պաշտպանը։
Կարդացեք նաև
Արփինե ՍԻՄՈՆՅԱՆ
