Էրեբունի համայնքում այսօր մի թոշակառու քաղաքացի, որը 2018-ին Նիկոլ Փաշինյանի աջակիցներից էր, իր դժգոհությունը հայտնեց իր ապրելակերպից, ստացած թոշակի չափից:
-2018-ին Հայաստանում նվազագույն թոշակը 18.000 դրամ էր, որը նվազագույն պարենային զամբյուղից էականորեն պակաս էր: Մենք եկանք առաջին քայլով թոշակը բարձրացրինք,- քաղաքացուն համոզում էր Փաշինյանը:
-Հիմա էլ է պակաս,- հակադարձեց թոշակառու քաղաքացին ու միանգամից ստացավ Փաշինյանի հավաստիացումը, որ հիմա պակաս չէ:
-Ապրիլի 1-ի դրությամբ կարող ենք երաշխավորել, որ Հայաստանում սոված թոշակառու բացառվում է, կոմունաներով բանով, Հայաստանի պատմության մեջ առաջին անգամ…,- շարունակեց համոզել Փաշինյանը:
Կարդացեք նաև
-Իմ 15 տարվա թոշակը մի ամսվա պարգեւավճար է: Էդ պրեմիաները թող մի քիչ քիչ լինի, մենք էլ ենք մարդ, մենք էլ ենք ուզում մսի կտոր ուտենք,- պատասխանեց քաղաքացին:
-Չէ, տենց չի,- վստահեցրեց Փաշինյանը:
-Տենց է, հաշվել եմ,- ասաց քաղաքացին:
-Նախ ապրիլի 1-ից մսի կտոր կարող եք ուտել, ձեր թոշակն այդքան է: Մենք մաֆիայի դեմ ենք պայքարում, մեր պաշտոնյան այնքան պետք է վարձատրվի, որ մաֆիան այդ պաշտոնյայի վրա չկարողանա ազդել ու մեր պաշտոնյային իր ջեբը չկարողանա գցի,- բացատրեց Փաշինյանը:
Արփինե ՍԻՄՈՆՅԱՆ
