«Այսօր առավոտյան եմ այցելել Դավիթին, գլխացավեր ուներ, գանգատներ ուներ։ Կարճ եմ հանդիպել, ասաց՝ անընդհատ ուզում է քնել։ Այժմ պալատում է, բայց չի կարողանում նստել, քանի որ գլխապտույտներ ունի»,- ՀՀ գլխավոր դատախազության դիմաց Դավիթ Մինասյանի ազատ արձակման պահանջով բողոքի ցույցի ժամանակ հայտարարեց մարտի 29-ին Սուրբ Աննա եկեղեցում Նիկոլ Փաշինյանի հետ միջադեպի գործով մեղադրյալ, երկու ամսով կալանավորված 12-րդ դասարանցի Դավիթ Մինասյանի պաշտպան Լուսինե Մարտիրոսյանը։
Ինչպես արդեն տեղեկացրել ենք, ՀՀ գլխավոր դատախազ Աննա Վարդապետյանը մերժեց հանդիպել ցուցարարներին: Նրանք Դավիթ Մինասյանին ազատ արձակելու կամ կալանքը տնային կալանքով փոխարինելու պահանջով իրենց դիմումը՝ տեղում հավաքված 150 ստորագրություններով փոխանցեցին դատախազություն։
Լուսինե Մարտիրոսյանն ասաց, որ բժշկական փաստաթղթերը ստացել են, օրինակներն ուղարկել են Վերաքննիչ քրեական դատարան․ «Կարծում եմ՝ այսօր դատարանը որոշման հրապարակման օր կնշանակի։ Ակնկալում ենք, որ դատարանը, այս բացառիկ հանգամանքները հաշվի առնելով, շտապողականություն կդրսևորի»։
Կարդացեք նաև
Փաստաբանն ասաց, որ չի ուզում հրապարակել բժշկական փաստաթղթերը, բայց վստահեցրեց՝ բժշկական ախտորոշումը մտահոգիչ է․ «Դավիթը լավ չէ։ Կալանքի տակ պահելուն բժիշկը հիմա ուղղակի չի կարող անդրադառնալ։ Կան հիվանդություններ, որոնք իրավական տիրույթում են»։
Նա ասաց, որ այժմ իրենց համար առաջնայինը Դավիթի կյանքի ու առողջության խնդիրն է, հետո կանդրադառնան կրթության իրավունքին․ «Դավիթին ազատ արձակելու հիմքերն առկա են, կանեն, թե՝ ոչ, չգիտեմ։ Ի սկզբանե Դավիթը չպիտի կալանավորվեր, քանի որ դրա հիմքերը չկային»։
Փաստաբանը հայտնեց, որ Դավիթի եղբայրը՝ Միքայելը, այժմ շատ ծանր հոգեբանական վիճակում է․ «Երկվորյակ եղբայրներ են, հիմա Միքայելն իր աղոթքներով եղբոր կողքին է»։
ՀՀ գլխավոր դատախազության դիմաց Դավիթ Մինասյանի ազատ արձակման պահանջով բողոքի ցույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
