«Մենք արդեն ստացել ենք ՀՀ-ԵՄ վիզաների ազատականացման շրջանակներում գործողությունների ծրագիրը։ Եվ սա նաեւ վերաբերվում է այն ոլորտներին, որոնք հենց կառավարության բարեփոխումների օրակարգում են։ Խոսքս միգրացիոն ոլորտին է վերաբերվում՝ ապաստանի հարցեր, մարդու իրավունքներ, սահմանների համալիր կառավարում, կազմակերպված հանցավորության ու կոռուպցիայի դեմ պայքար եւ այլն»,- ԱԺ նստաշրջանում կառավարության 2021-2026 թվականների ծրագրի ներկայացման ժամանակ ասաց ՆԳ նախարար Արփինե Սարգսյանը։
Նա նշեց, որ առաջին զեկույցի գնահատումը տեղի կունենա մայիսին, ասաց, որ վստահ է՝ դրական արդյունքներ կարձանագրվեն։
«Այս համատեքստում անընդհատ հարց է հնչում՝ չկա՞ մտավախություն, որ վիզաների ազատականացման շրջանակներում մենք կունենանք արտագաղթի ռիսկ դեպի Եվրոպական միություն։ Ես ուզում եմ վստահությամբ նշել, որ նմանատիպ մտավախություն Հայաստանի Հանրապետությունը չունի, որովհետեւ ՀՀ-ում հաստատված խաղաղության, ոլորտային բարեփոխումների արդյունքում է, որ արտագաղթը վերաճել է ներգաղթի։ Եվ այս պայմանների՝ խնամքով պահպանման պայմաններում ներգաղթի միտումները գնալով ավելի կշատանան»,- ասաց նա։
Կարդացեք նաև
Արփինե Սարգսյանն անդրադարձավ նաեւ նոր կենսաչափական համակարգի ներդրման աշխատանքներին։ Ասաց, որ թռիչքաձեւ զարգացման լուծումներ են նախատեսում այս ոլորտում։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
