«Բագրատ սրբազանի ծննդյան տորթը դարձավ պատմություն»,- այսօր «18 արդարների» գործով նիստի ժամանակ հայտարարեց գործով մեղադրյալ, ԱԺ պատգամավոր Արթուր Սարգսյանը՝ պարզաբանելով, որ նախորդ նիստում սրբազանի ծննդյան տոնը շնորհավորելու համար դահլիճ բերված փոքրիկ տորթը խնդիր է դարձել դատական կարգադրիչների համար։ Նրանք այսօր փորձել են արգելել անգամ ջուր մտցնել դատարանի դահլիճ․ «Այս երկրում ամեն ինչ սպասում ենք, բայց տեսեք, թե ի՞նչ վիճակի մեջ են, որ ուզում են մեր ջուրը կտրեն»։
Արթուր Սարգսյանը դատարանի ուշադրությունը հրավիրեց այն փաստին, որ դահլիճը դատարկ է, նիստին ներկա գտնվել ցանկացող քաղաքացիներին կարգադրիչներն արգելել են մտնել դահլիճ։
Գործով մեղադրյալ Լիդիա Մանթաշյանն էլ հավելեց․ «Կարգադրիչները մեզ անցած անգամ սպառնացին՝ ասացին՝ կտեսնեք հաջորդ նիստում ինչ է լինելու։ Այսօր ոչ ոքի թույլ չտվեցին մտնել դահլիճ, ու հիմա այն կողմից հրճվում են։ Իսկ տորթը թույլ տվեցին մտցնել այն բանից հետո, երբ ասացինք՝ ցույց տվեք, թե ինչի հիման վրա չեք թույլատրում»։
Կարդացեք նաև
Դատավոր Կարեն Ֆարխոյանը պարզաբանեց՝ նախապես դատարանի հետ պետք է համաձայնեցնեին տորթը դատական դահլիճ մտցնելու հարցը, դատարանը բանավոր կարգադրություն կտար կարգադրիչներին, խնդիր չի լինի․ «Լավ եք արել, Բագրատ սրբազանին շնորհավորել եք, բայց դա իրավունք չունեիք անելու՝ առանց դատարանի թույլտվության»։ Նաև հստակեցրեց՝ կարգադրիչներին դատական նիստին չթույլատրելու հրահանգ չի տրվել, նիստը դռնբաց է, քաղաքացիները կարող են նստել դահլիճում։
Մանրամասները՝ տեսանյութում։
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
