«Armat Media»-ի աշխատանքը շարունակվում է կաթվածահար մնալ: Մենք տեղաշարժ չունենք, ոչ հարցաքննության են հրավիրել, ոչ աշխատակիցների անձնական հեռախոսներն են վերադարձրել, ոչ էլ մեր խմբագրության տեխնիկան: Խմբագրության դռները կապարակնքված են, չենք կարողանում մեր աշխատասենյակ մտնել ու անորոշ վիճակում ենք: Միայն գիտենք, որ փաստաբանները բողոքարկման գործընթաց են սկսել դատարանի որոշման դեմ»,- Aravot.am-ին փոխանցեց Armat Media անկախ լրատվական գործակալության խմբագիր Աղավնի Սուքիասյանը։
«Աշխատակիցներն իրենց անձնական համակարգիչները դարձրել են աշխատանքային, ու որպեսզի կայքի գործունեությունը չդադարեցնի, տնից են աշխատում: Բայց մի բան է՝ խմբագրությունից աշխատելը, մեկ այլ բան՝ տնից: Այդ վիճակում ենք։
Մենք չենք կարողանում գրասենյակում հավաքվել, մեր ժողովներն անել, չենք կարողանում խմբագրությունից մեր աշխատանքը նորմալ, բնականոն հունով իրականացնել: Ու հայտնի էլ չէ, թե երբ կվերադարձնեն մեր անձնական հեռախոսները և խմբագրության տեխնիկան»,- ասաց Աղավնի Սուքիասյանը։
Հիշեցնենք, որ հունիսի 5-ին քննչական գործողություններ են իրականացվել «Ուժեղ Հայաստան» կուսակցության ղեկավար Սամվել Կարապետյանի թիմի անդամ, կալանավորված Ալեքսան Ալեքսանյանի սեփականությունը հանդիսացող Armat Media-ի խմբագրությունում, ինչը Հայաստանի ժուռնալիստների միությունը դատապարտել էր ու որակել է լրատվամիջոցի դեմ ուղղված ոտնձգության զարհուրելի փաստ, իսկ ՄԻՊ Անահիտ Մանասյանը խմբագրությունում իրականացված գործողությունների իրավական հիմքերի և դրանց ընթացքի վերաբերյալ պարզաբանումներ էր պահանջել իրավասու պետական մարմիններից։
Կարդացեք նաև
Գոհար ՀԱԿՈԲՅԱՆ
