«Ոչ, չեմ համարում, որ իմ նախընտրական խոստումները կատարվել են։ Նախընտրական իմ խոստումները կհամարեմ իրականացված, եթե ամբողջ թալանվածը հատիկ առ հատիկ մինչև վերջ հետ բերվի, տակը մնա այն, ինչին ձեզ հայտնի շրջանակներն արժանի են։ Կհամարեմ կատարված, երբ մարտի 1-ի գործող պատասխանատուները ենթարկվեն պատասխանատվության, խարդախությամբ ու քցելով հարստացածները ենթարկվեն պատասխանատվության»,-հարցին՝ ԲՀԿ առաջնորդ Գագիկ Ծառուկյանի նկատմամբ իրավապահների գործողությունները Ձեզ գոհացնո՞ւմ են և արդյոք համարո՞ւմ եք, որ Ձեր նախընտրական խոստման մի մասը՝ Ծառուկյանին բանտ նետելը, կատարված է, մնում է ունեզրկման գործընթացն իրականացնել, լրագրողների հետ ճեպազրույցում այսպես արձագանքեց ՀՀ վարչապետ Նիկոլ Փաշինյանը։
Նա պնդեց, որ իրավապահները գործում են իրենց լիազորությունների շրջանակում։
Լրագրողի դիտարկմանը՝ շատերի կարծիքով՝ Գագիկ Ծառուկյանի դեպքում բոլոր փաստերը Ձեզ հայտնի էին, սակայն քայլեր չէիք ձեռնարկում և հիմա գործում եք՝ ըստ քաղաքական նպատակահարմարության, Նիկոլ Փաշինյանն այսպես արձագանքեց․ «Ութ տարի ստիպված ենք եղել պայքարել դատաիրավական մաֆիայի դեմ։ Այդ գործերը պատշաճ ընթացք չեն ստացել, այդ թվում հանցավոր պայմանավորվածությունների պատճառով»։
Կարդացեք նաև
RA Prime Minister Nikol Pashinyan answers questions from journalists at the Government Building of Yerevan, Armenia
Հարցին՝ Գագիկ Ծառուկյանի և մյուսների դեմ իրավապահների գործողությունների դրվագները, որ տեսնում եք, ի՞նչ եք զգում, Նիկոլ Փաշինյանը պատասխանեց․ «Ես Ձեր նկարագրած տեսարանները չեմ տեսել, որովհետև դրանք ինձ չեն հետաքրքրում։ Գաղափար չունեմ՝ ինչի մասին եք խոսում։ Ինչ վերաբերում է ասֆալտին փռելու և ոչ միայն փռելու՝ իմ տված հրահանգներին, ապա դրանք տրվել են շատ վաղուց, և հարց է, թե ինչու այդ հրահանգները չեն կատարվել։ Այն ինչ ասել եմ՝ պետք է դառնա իրականություն, այդ թվում այն պատճառով, որ ՀՀ ժողովուրդը քվեարկել է դրա օգտին»։
Նիկոլ Փաշինյանի ճեպազրույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
