Կառավարության այսօրվա նիստում չզեկուցվող հարցերի թվում կառավարության պահուստային ֆոնդից 5 մլրդ դրամ հատկացրեց պետական կառավարման համակարգի մի շարք մարմինների աշխատակիցների պարգևատրման նպատակով։
«ՀՀ կառավարության կողմից 2025 թվականի նոյեմբերի 27-ի ընդունված «Պետական կառավարման համակարգի առանձին մարմինների կատարողականի գնահատման և դրա հիման վրա խրախուսման պիլոտային կարգը և պետական կառավարման համակարգի առանձին մարմինների ցանկը հաստատելու մասին» N 1712-Լ որոշմամբ առաջարկվում է պիլոտավորել նոր չափորոշիչների հիման վրա խրախուսման համակարգ՝ կատարողականի գնահատումների միջոցով։ Հաշվի առնելով, որ պետական կառավարման մարմինները արդեն իսկ գնահատվել են 2026 թվականի 1-ին կիսամյակի արդյունքներով, անհրաժեշտություն է առաջացել ապահովել նշյալ որոշման կատարումը՝ խրախուսման ֆոնդ հատկացնելով պետական մարմիններին»,- նշվում է որոշման մեջ։
Ըստ կառավարության՝ այս որոշման նպատակը պետական կառավարման համակարգի արդյունավետության բարձրացումն է, ինչպես նաև խրախուսված աշխատակիցների համար գիտական և կրթական կարողությունների զարգացման վրա ներդրումների կատարումը։ Նշվում է, որ սա պիլոտային ծրագիր է, որի իրականացման համար 2026 թվականի 1-ին կիսամյակի արդյունքներով կպահանջվի շուրջ 5 մլրդ ՀՀ դրամ:
Կարդացեք նաև
«Սույն որոշման ընդունման անհրաժեշտությունը պայմանավորված է Հանրային կառավարման բարեփոխումների ռազմավարությամբ և ՀՀ կառավարության 2021-2026 թվականների գործունեության միջոցառումների ծրագրով ստանձնած հանձնառություններով, մասնավորապես՝ պետական հատվածում ֆինանսական մոտիվացման համակարգի լավարկման նպատակով հանրային ծառայողների վարձատրության համակարգի վերանայման անհրաժեշտությամբ»,- նշվում է կառավարության հիմնավորման մեջ։
Ռոզա ՀՈՎՀԱՆՆԻՍՅԱՆ
