Ավտոսպորտի աշխարհը քննարկում է հիանալի լուր. հայտնի մրցարշավորդ Նիկոլա Պրոստի որդին և «Ֆորմula-1»-ի լեգենդար քառակի չեմպիոն Ալեն Պրոստի թոռը՝ Քիմի Պրոստը, համալրել է հայկական GoroyanRT թիմի կազմը։
Քիմի Պրոստն ուրախալի լուրով անձամբ է կիսվել իր հետևորդների հետ՝ գրելով. «Ես անչափ հպարտ և երջանիկ եմ կրելու GoroyanRT-ի գույները և ներկայացնելու իմ հայկական արմատները»։ Իր հրապարակման մեջ երիտասարդ մրցարշավորդը նաև իր անկեղծ երախտագիտությունն է հայտնել թիմի հիմնադիր Արթուր Գորոյանին։
Արթուր Գորոյանն իր հերթին ջերմորեն ողջունել է նոր մրցարշավորդին՝ ընդգծելով սերունդների հաջորդականությունը. «Ուրախ եմ ողջունելու Քիմիին GoroyanRT-ում։ Մրցավազքն ընտանեկան գործ է՝ պապիկից մինչև հայրը, իսկ հիմա՝ նաև նա։ Բարի գալուստ մեր մեծ ընտանիք, Քիմի»։
Կարդացեք նաև
Ավտոսպորտային փառահեղ դինաստիայի շարունակությունը
Ավտոսպորտը Պրոստների ընտանիքի համար պարզապես սպորտ չէ, այլ բազմամյա ավանդույթ, որն այժմ շարունակվում է նոր մակարդակով.
* Նիկոլա Պրոստ (հայր): Հաջողակ պրոֆեսիոնալ մրցարշավորդ, ով հասել է մեծ հաղթանակների Formula E-ում և Լե Մանի հանրահայտ «24 ժամ» մարաթոնում, ինչպես նաև աշխատել է որպես Formula-1-ի Lotus F1 Team թիմի պաշտոնական թեստ- և դևելոփմենթ-պիլոտ։ Նիկոլան ակտիվորեն կապված է հայկական սփյուռքի հետ և մեծ ուշադրություն է դարձնում Հայաստանի սպորտային նախաձեռնությունների աջակցությանը։
* Քիմի Պրոստ (որդի): Նշանավոր դինաստիայի երիտասարդ սերնդի ներկայացուցիչ։ Այժմ պաշտպանելու է հայկական GoroyanRT թիմի գույները՝ շարունակելով ընտանեկան գործը։
* Ալեն Պրոստ (պապիկ): «Formula-1»-ի հանրահայտ քառակի չեմպիոն, որի անունը ոսկե տառերով է գրված համաշխարհային ավտոսպորտի պատմության մեջ։ Ալենը միշտ բացահայտ հպարտացել է մոր կողմից իր հայկական արմատներով՝ հայտարարելով. «Ես հայերեն չեմ խոսում, բայց ես հայ եմ, և դա ամենակարևորն է»։
GoroyanRT թիմը
GoroyanRT մրցարշավային թիմը, որը 2023 թվականին ստեղծվել է Արթուր Գորոյանի նախաձեռնությամբ, վստահորեն զարգանում է և իր շարքերն է ներգրավում համաշխարհային ավտոսպորտի աստղերին։ Կոլեկտիվը հանդես է գալիս Հայաստանի ավտոսպորտի ֆեդերացիայի (FAA) և նրա նախագահ Արամ Սարգսյանի ակտիվ աջակցությամբ՝ հաջողությամբ ներկայացնելով երկիրը միջազգային ասպարեզում։
Թիմի գոյության տարիներին նրա կազմում հանդես են եկել համաշխարհային մակարդակի բազմաթիվ հայտնի մրցարշավորդներ, այդ թվում՝ Մարկուս Վինկելհոկը, Ալեքս Ֆոնտանան, Նիկո Մենցելը, Նաթանայել Բերտոնը և այլք։
Բացի միջազգային մրցումներին մասնակցելուց, GoroyanRT-ն ակտիվորեն նպաստում է Հայաստանում ավտոսպորտի զարգացմանը. թիմը կազմակերպում է հետաքրքիր մրցավազքեր և բացել է քարտինգի դպրոց, որտեղ պատանի տաղանդները կարող են կատարել առաջին քայլերը մեծ սպորտում։
Հարկ է նշել, որ Արթուր Գորոյանը և Նիկոլա Պրոստը միավորված են ավտոսպորտի զարգացման ընդհանուր նպատակով. նրանք երկուսն էլ ընդգրկված են Հայաստանի ավտոսպորտի ֆեդերացիայի (FAA) ռազմավարական խորհրդատվական խորհրդի կազմում՝ ֆեդերացիայի նախագահ Արամ Սարգսյանի ղեկավարությամբ։
