«Այն, ինչ տեղի է ունեցել Արցախի հետ, անարդարություն է, դա հանցանք է միջազգային առումով։ Եվ շուտ-ուշ, վստահ եմ, որ այդ հանցանքի մասնակիցները պատասխանատվության են ենթարկվելու։ Չէր կարող 21-րդ դարում Եվրոպայի խորհրդի պատասխանատվության տարածքում տեղի ունենալ նման պատերազմ, չէր կարող տեղի ունենալ ցեղասպանություն ու մարդկանց բռնի տեղահանություն՝ միայն ու միայն իրենց ազգային պատկանելության իմաստով»,- Արցախի Հանրապետության հռչակման 35-ամյակի առիթով Եռաբլուր կատարած այցի ժամանակ լրագրողներին ասաց ՀՀ ԱԺ «Ուժեղ Հայաստան» խմբակցության պատգամավոր Էդգար Ղազարյանը։
Անդրադառնալով Փաշինյան-Պուտին հանդիպմանը՝ Էդգար Ղազարյանն ասաց․ «Ես կարծում եմ, որ դա հարաբերությունների զարգացման մասին հանդիպում չէր, այլ ճիշտ հակառակը։ Առհասարակ, վերջին հանդիպումն էլ, որը տեղի էր ունեցել Մոսկվայում ընտրություններից առաջ, կրկին նույն ոգով էր։ Եվ չի կարող հարաբերությունների զարգացման մասին խոսք լինել Փաշինյանի նման տրամադրվածության պայմաններում։ Չմոռանանք նրա ելույթը ԱԺ-ում, երբ նա ՌԴ նախագահին փաստացի մեղադրեց Հայաստանում իշխանություն տապալելու եւ իշխանության փոփոխություն իրականացնելու փորձի մասին։ Սա չափազանց լուրջ մեղադրանք է, որ կարող է մի պետության ղեկավարը ներկայացնել այլ պետության»։
Կարդացեք նաև
Մանրամասները՝ տեսանյութում
Էդգար Ղազարյանը նշեց, որ Ռուսաստանը Հայաստանում այս պահին ունի երկու ստացիոնար ռազմական ներկայություն․ 102-րդ ռազմաբազայից բացի` նաեւ Անվտանգության դաշնային ծառայության սահմանապահ զորքերն են Հայաստանում։ «Քանի որ Հայաստանը Թուրքիայի հետ պետական սահմանի մասին առանձին համաձայնագիր չունի, ռուսական սահմանապահ զորքերն այստեղից հեռացնելուց եւ այդ պայմանագիրը չեղարկելուց հետո իրավաբանորեն վերանալու է նաեւ հայ-թուրքական սահմանը։ Կարծում եմ, որ սա չափազանց մեծ վտանգ է՝ թուրքական ռազմական ներկայությունը, սահմանին տեղաշարժը ՀՀ տարածքում իրականացնելու նպատակով։ Կարծում եմ՝ Փաշինյանի հիմնական նպատակներից մեկն էլ դա է»,- ասաց նա։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
