«Ես ամբողջական դատավճիռը մանրակրկիտ ուսումնասիրել եմ՝ անգլերեն թարգմանված տարբերակը, նման դրվագներ չկան։ Աբսուրդն այն է, որ կան վկաներ, որոնք վկայություն են տվել՝ օրինակ՝ լրագրողների են տեղափոխել Քարվաճառ և տեղափոխման ժամանակ ական է պայթել, վնասվածքներ են ստացել, հետաքրքիր է, որ այդ վկաներն աղաչել են դատարանին, որ ամենածանր պատիժը կիրառեն հենց Ռուբեն Վարդանյանի նկատմամբ։ Սակայն չկա վկայություն, որ վկան տեսել է, թե ինչպես է Ռուբեն Վարդանյանն ականապատում Քարվաճառը կամ հրահանգավորում է»,- հարցին՝ ի՞նչ են ցույց տալիս Ձեր ուսումնասիրություններ, կարո՞ղ ենք ասել, որ չկա գեթ մեկ վկա կամ տուժող, որ կներկայացներ կոնկրետ փաստական տվյալներ, որ Ռուբեն Վարդանյանը կոնկրետ այսինչ օրն իր հանդեպ որևէ հստակ արարք է թույլ տվել, մամուլի ասուլիսի ժամանակ հայտնեց ՄԻԵԴ-ում հայ գերիների շահերի ներկայացուցիչ, «Միջազգային և համեմատական իրավունքի կենտրոնի» ղեկավար Սիրանուշ Սահակյանը։
Նա վստահեցրեց՝ Ռուբեն Վարդանյանի գործով արդեն հրապարակված մեղադրական եզրակացությունում և դատավճռում չկա որևէ փաստ, որ ադրբեջանական կողմը, հասանելիություն ունենալով Ռուբեն Վարդանյանի բոլոր էլեկտրոնային սարքավորումներին առցանց հարթակում, նաև գրասենյակում եղած ողջ փաստաթղթերին, կարողացել է գտնել մի փաստաթուղթ, որտեղ Ռուբեն Վարդանյանը հրահանգել է, մասնակցել է ականապատման որոշման կայացմանը․ «Նման վկաներ չկան։ Վկաները տալիս են ընդհանրական վկայություններ։ Երբեմն դժբախտ պատահարների զոհերի պատասխանատվությունը ևս դրված է Ռուբեն Վարդանյանի վրա։ Ենթադրում եմ, որ համանման մոտեցում որդեգրել են նաև Բաքվում գտնվող մյուս 15 հայ ռազմագերիների գործով։ Օրինակ՝ վատ եղանակային պայմանների պատճառով, երբ մեքենան վնասվածք է ստացել, և դրա մեջ գտնվող ուղևորն ընկել է ու ունեցել վնասվածքներ, այդ վնասվածքի մասին խոսող վկան ևս խնդրել է, որ Ռուբեն Վարդանյանի նկատմամբ կիրառվի ամենածանր պատիժը։ Այդ դատարանները համարել են, որ եղած ողջ 30 տարվա իրադարձությունների պատասխանատուն պետք է հռչակել հենց Ռուբեն Վարդանյանին»։
Սիրանուշ Սահակյանի ասուլիսն ամբողջությամբ՝ տեսանյութում
Կարդացեք նաև
Տաթև ՀԱՐՈՒԹՅՈՒՆՅԱՆ
