«Կուսակցությունը (ՀՅԴ-ն- Վ. Դ.) ոչ թե նշանակում է նախարարի, փոխնախարարի կամ վարչության պետի, այլ առաջարկում է։ Առաջարկելու դեպքում մենք չենք կարող սահմանափակվել մեկ կամ երկու անձով։ Կրթության ոլորտում էլ մի թեկնածու չի եղել, եղել է ցանկ, որից նախագահը, հավանաբար խորհրդակցելով վարչապետի հետ, ընտրել է այնպիսի թեկնածու, որի հետ կարող է ավելի լավ աշխատել։ Եվ նա չի սխալվել, ինչպես չէր սխալվի, եթե ընտրեր մեկ ուրիշի, որովհետեւ մենք հաշվարկված էինք տվել այդ անունները»։
ՎԱՀԱՆ ՀՈՎՀԱՆՆԻՍՅԱՆ ՀՀ նախագահի խորհրդական, ՀՅԴ Հայաստանի ԳՄ ներկայացուցիչ, «Իրավունք», թիվ 19
Քանի որ կադրերի առումով առաջարկի եւ պահանջարկի խիստ անհամապատասխանություն կա, քանի որ, բացի այդ, կառավարությունն էլ կադրերի բանկ է ստեղծում՝ մոտ ժամանակներս Հայաստանը կդառնա դաշնակցական նախարարներ, դաշնակցական փոխնախարարներ, դաշնակցական վարչությունների պետեր եւ դաշնակցական ալյեւայլ չինովնիկներ արտահանող երկիր։ Իր գոյության 108 տարիներին ահա այսպիսի առատ արհեստավարժներ է կուտակել ՀՅԴ-ն, սիրելի՛ ընթերցող։
ՀԻՇԵՑՄԱՆ ՃՇՏՈՒՄ
Կարդացեք նաև
«Հիշեցնենք նաեւ Արամ Աբրահամյանի, «Դրոյի», «31»-ի գործերով դատավարությունները եւ, վերջապես, այդ ամենի կազմակերպչի վերջին օրը, վերջին ելույթը՝ վերջին թունավոր խայթոցը, այս անգամ ոչ թե մի կուսակցության, այլ ողջ մի ժողովրդի»։
«ԵՐԿԻՐ», խմբագրական, 7 մայիսի
Ինչ վերաբերում է, մասնավորապես, Արամ Աբրահամյանի դատավարությանը, ապա այն դեռեւս չի եղել։ Բայց հուսահատվելու կարիք չկա, ամեն ինչ դեռ առջեւում է։
ԱՆԱՆՁՆԱԿԱՆ
«Անձերով չի որոշվելու ՀՀՇ-ի ապագան»։
ԲԱԲԿԵՆ ԱՐԱՐՔՑՅԱՆ ԱԺ «Հանրապետություն» խմբակցության ղեկավար, «Առավոտ», 8 մայիսի
Եթե ՀՀՇ-ն պրն Արարքցյանի ասածն ընդունի գործունեության ելակետ՝ ապա իր ապագան կերտելիս առհասարակ պիտի հրաժարվի անձերի ծառայություններից, առհասարակ՝ անձերից։ ՀՀՇ-ի ապագան, այդպիսով, բաղկացած կլինի գաղափարախոսությունից ու մեկ էլ երեւույթներից։ Քանի որ անձերը ոչինչ չեն որոշի՝ ամենքին կպատի անանձնական թախիծ։
ՎԱՍԱԿ ԴԱՐԲԻՆՅԱՆ
