Ռոք երաժշտությունն ամբողջ աշխարհում սկսեց տարածվել ու ճանաչում ձեռք բերեց 1950-ականներին: Հայաստանում մարդիկ ռոք սկսեցին լսել ավելի ուշ: Այսօր էլ ռոքը մեզ մոտ համարվում է հասարակության մի մասին հասանելի երաժշտություն: Ռոք երաժշտության առաջացման համար կոնկրետ թվական չի նշվում, այլ պարզապես ասվում է՝ 1950-ականներ: Այս երաժշտությունն առաջին անգամ մարդիկ լսեցին Նյու Յորքի ռադիոկայաններից մեկով: Ալեն Ֆրեդ անունով մի DJ հեռարձակեց այս անծանոթ, բայց կիրք եւ պարելու ցանկություն առաջացնող երաժշտությունը: Հետո նա ստեղծեց մի ռադիոծրագիր, որը վարում էր Moon Dog ծածկանվամբ: Ծրագիրը կոչվում էր Moondog`s Rock’n’Roll party:
Ռոք երաժշտությունը հեղափոխություն էր. այն փոխեց մի ամբողջ սերնդի մտածելակերպ: Այսօր ռոքը շատ մարդկանց համար ոչ միայն երաժշտական ոճ է, այլեւ ապրելակերպ, աշխարհը յուրովի ընկալելու ձեւ:
Եվ չնայած ռոքը հենց սկզբից միանշանակ չընդունվեց հասարակության կողմից, սակայն այսօր այն տարածվել է ամբողջ աշխարհում:
Հայաստանում եւս կան շատ ռոք խմբեր, այժմ շատերն են նախընտրում երաժշտական այս ոճը: Որոշ մարդկանց համար ռոք լսելը նույնիսկ զարգացածության չափանիշ է: Բայց կան նաեւ մարդիկ, որոնց ռոքը բացարձակ դուր չի գալիս: Շատերի մոտ այն բացասական ազդեցություն է թողնում, որովհետեւ հանդարտություն, ներդաշնակություն չունի ու մղում է անհանգստության:
Հոգեբան Արման Առաքելյանը ռոք երաժշտության սիրահարներին տեղեկացնում է. «Մարդն ունի ներքին հաճախություն, որով աշխատում են բոլոր օրգանները, արյունը շրջանառվում է երակներում: Երաժշտության հաճախությունը պետք է համապատասխանի մարդու ներքին հաճախությանը: Ռոք համերգների ժամանակ, երբ երաժշտության հաճախությունը հասնում է 240-ի՝ րոպեում (60-80-ի փոխարեն), մարդու մոտ առաջանում է ձայնային սթրես, որը պատճառ է դառնում օրգանիզմում մի շարք խախտումների: Իսկ մակերիկամների արտադրած մեծ քանակությամբ ադրենալինը փոփոխություններ է առաջացնում մարդու օրգանիզմում»:
