Հետեւություններ եւ պլաններ՝ ըստ ԳԹԿ տնօրեն Գուրգեն Խաչատրյանի
![\"\"](\"https://www.aravot.am/2011/aravot_arm/September/6/p11.jpg\")
Գնահատման եւ թեստավորման կենտրոնի (ԳԹԿ) տնօրեն Գուրգեն Խաչատրյանը «Առավոտի» հետ զրույցում հետահայաց ամփոփելով ԳԹԿ ջանքերը միասնական քննությունների անցկացման առումով, գոհունակություն հայտնեց: Նա կարծում է, որ իրենց աշխատակազմը տարիների ընթացքում արհեստավարժ է դարձել: Պարոն Խաչատրյանը, սակայն, ինչ-ինչ վերապահումներ ունի քննական կարգի հետ կապված, գտնում է, որ այն լրամշակման կարիք ունի, հստակեցնելու բաներ կան: «Երբեմն իրադրություն է ստեղծվում, որի բացատրությունը քննակարգը չունի: Օրինակ, ի՞նչ է նշանակում քննության սկիզբ. դա նշված ինն անց կե՞սն է, թե՞ ծրարները բացելու պահը: Չէ՞ որ մի քննակենտրոնում մեկը շուտ է բացում ծրարը, մյուսը՝ ուշ: Ամեն դեպքում, եթե քննության սկիզբը 9.30-ն է, եւ դիմորդը քննակենտրոն է հասել 9.29-ին, պարտավոր ենք թույլ տալ, որ մասնակցի քննության: Մի խոսքով, կյանքը ցույց է տալիս, որ ցանկացած փաստաթուղթ վերանայման կարիք ունի, կարծում եմ այդ ուղղությամբ եւս ինչ-որ բան կարվի»,- ասում է ԳԹԿ տնօրենը եւ իրենց ամենամեծ հաջողությունն է համարում այն, որ արտահոսք չի եղել ոչ միասնական քննությունների, ոչ էլ 9-րդ դասարանի թեստերի մասով: «Չնայած կային ինչ-ինչ ճնշումներ, մարդիկ համառորեն ուզում էին ունենալ թեստերը, բայց կոլեկտիվը երբեք գործարքի չգնաց»,- հավելում է նա:
Մեր զրույցի ընթացքում անդրադարձ եղավ նաեւ շտեմարանների խնդրին, որը, ըստ Գ. Խաչատրյանի, շատ լուրջ է դրված, եւ ԳԹԿ-ն նախատեսել է հոկտեմբեր-նոյեմբեր ամիսներին ունենալ եւ հայոց լեզվի, եւ մաթեմատիկայի շտեմարանները:
Իսկ ինչո՞ւ հենց այդ երկու առարկաները: Գ.՚Խաչատրյանի խոսքով, դրանք ամենամեծ քննություններն են եւ ավելի շատ են տեղիք տալիս զանազան խոսակցությունների: «Շտեմարանային բազա ձեւավորելու համար պայմանագիր ենք կնքել որոշ խմբերի հետ եւ արդեն թեստերի նախնական քանակ ունենք, բայց դա բավարար չէ, որովհետեւ ենթադրում ենք առնվազն 5000 առաջադրանք ունենալ»,-նշում է ԳԹԿ տնօրենը:
Ինչպե՞ս է կատարվել մասնագետների ընտրությունը: «Ես եւ ԳԹԿ խորհրդի նախագահ Մանուկ Մկրտչյանը մաթեմատիկոս ենք, եւ գոնե մաթեմատիկայի լավագույն մասնագետներին ճանաչում ենք, ի վերջո, նրանց հետ շփվել ենք վերջին 5-6 տարիներին: Ընտրել ենք հատկապես այնպիսի մասնագետների, որոնք բարեխիղճ են, կարող են նուրբ աշխատել եւ կազմակերպչական շնորհք ունեն»,- ասում է մեր զրուցակիցը: Ըստ նրա, մաթեմատիկոսների խումբն ավելի է ընդլայնվել, այնտեղ կան Կրթության ազգային ինստիտուտից մասնագետներ, դպրոցների ուսուցիչներ, մարդիկ, ովքեր արդեն տպագրված թեստեր ունեն: «Հայերենի մասով էլ նույնկերպ ենք վարվել: Մեր աշխատակից, հայերենի մասնագետ Միրցա Հալաջյանի հետ միասին մեծ աշխատանք է կատարվել, շտկվել են արդեն եղած թեստերը, որովհետեւ լավ մասնագետ լինելը մի բան է, թեստաբանությունը՝ մեկ այլ»,- տեղեկացնում է պարոն Խաչատրյանը:
Նա նաեւ հայտնեց, որ ԳԹԿ-ն պատրաստվում է առաջիկայում մասնակցել միջազգային գիտաժողովի, պայմանավորվածություններ կան միջազգային թեստավորում անցկացնող ռուսաստանցի մասնագետների հետ: Հայաստանին հնարավորություն է ընձեռվել առանց վճարի մասնակցել «Թիմսի» (Trends in International Mathematics and Science Study) նման մի նախագծի, որը ունակությունների ստուգման թեստերով է առաջնորդվում: «Շուտով ռուսական դասարաններում կփորձարկենք դրանք, այնուհետեւ հոկտեմբերին՝ հանրապետության բոլոր դպրոցներում: Ռուսական կողմը պատրաստ է նույնիսկ համակարգիչներ տրամադրել այն մարզերի դպրոցներին, որոնք չունեն կոմպյուտերային դասարաններ»,- նշում է Գ. Խաչատրյանը եւ հիշեցնում, որ այս ամենին զուգահեռ՝ ԳԹԿ-ն պիտի ուսումնասիրություն անցկացնի, որպեսզի 3 տարվա կտրվածքով տեսնի դինամիկան՝ ո՞ր դպրոցի ո՞ր դասարանում են լավ աշխատել եւ հակառակը:
