«Կներեք, բայց սխալ մարդու եք սիրո խոստովանություն անում»:
«Ո՞նց, բայց ես հենց քեզ եմ սիրում, Մարինե ջան»:
«Ես Մարինեն չեմ, Նարինեն եմ:»
ԵՊՀ-ում սովորող երկվորյակ քույրերի արտաքին նմանությունը շփոթության մեջ էր գցում ոչ միայն նրանց դասախոսներին ու համակուրսեցիներին, այլև նրանց երկրպագուներին և շատ հաճախ նաև հենց քույրերին: Անանուն ծաղիկներն ու սիրո խոստովանությունները միշտ չէ, որ ճիշտ հասցեատիրոջն էին հասնում, սակայն զվարճալի թյուրիմացությունները միշտ էլ բարեհաջող ավարտ էին ունենում: Ճիշտ է` Հայկը, սիրելով Մարինեին, ամիսներ շարունակ հետևել էր Նարինեին, բայց այսօր` նոյեմբերի 17-ին, նախկին ուսանողները ժպիտով կհիշեն իրենց առաջին հանդիպումն ու կնշեն իրենց ամուսնության 5-րդ տարին: «2-րդ կուրսում ուսանողների օրը Նարինեն ու իր համակուրսեցիները որոշել էին գնալ թատրոն, բայց քույրս բարձր ջերմություն ուներ և քանի որ ես նրա ընկերուհիների հետ մտերիմ էի, ինքս գնացի»,- պատմում է Մարինեն:
Հենց այնտեղ էլ Հայկը նկատել էր ժպտերես ու աշխույժ աղջկան, հետաքրքրվել էր և հաջորդ օրը համալսարանում տեսնելով Նարինեին սկսել էր հետևել նրան: Հաճախ էր անակնկալներ արել իր «կարծեցյալ» սիրելիին, սակայն ամենամեծ անակնկալը ինքն էր ստացել, երբ վերջապես որոշել էր սիրո խոստովանություն անել:
«Սկզբում չհավատացի, որ Մարինեն չի: Կարծեցի` ուղղակի ինձ հեռու պահելու համար ա էդպես ասում, բայց երբ շատ համառեցի, ասաց, թե որտեղ է սովորում Մարինեն»,-պատմում է Հայկը և ավելացնում, որ այդ ժամանակ իրեն տարօրինակ թվացող շատ հանգամանքներ պարզ են դարձել: Սիրահարված երիտասարդը մինչ այդ ուշադրություն չէր դարձնում այն հանգամանքին, որ Մարինեն համալսարան էր գալիս մի զգեստով, տուն էր գնում բոլորովին այլ զգեստով, հաճախ էր փոխում սանրվածքը և տարբեր ընկերական շրջապատներում էր լինում:
«Շատ շփոթված էի, իսկ երբ Մարինեին ու Նարինեին միասին տեսա շատ ավելի շփոթվեցի: Բայց իրանք ինչքան նման են արտաքինով, նույնքան էլ տարբեր են բնավորությամբ: Նարինեն շատ լուրջ ու ամաչկոտ է, իսկ Մարինեն շատ աշխույժ ու անկաշկանդ: Հենց դա էլ ինձ գրավել էր»:
Թյուրիմացությունը ավարտվեց, բայց Հայկի փորձությունները ևս մեկ տարի շարունակվեցին, մինչև Մարինեն համաձայնեց ամուսնանալ նրա հետ: «Սկզբում Հայկին չէի հավանում: Երբ նա ինձ սիրո խոստովանություն արեց, շատ բարկացած էի, ասացի. «քույրիկիս էլ ես նույն բանն ասել», ասաց`չէ, ես քույրիկիդ նկատմաբ նույն բանը չէի զգում»: Շփոթված փեսացուին խորամանկ քայլից բացի ոչինչ չէր մնում. շահել Նարինեի վստահությունը և գաղտնի համագործակցելով նրա հետ` գրավել Մարինեի սիրտը:
Հերմինե Աղաջանյան
