«Սարդարապատ» շարժման նախաձեռնող խմբի անդամները «Ուրբաթ» ակումբում կոչ արեցին բանակի սպայակազմին՝ այնպիսի կեցվածք դրսևորել, որ գերադասը հասկանա, թե անիմաստ է «Արտակարգ դրության իրավական ռեժիմի մասին» օրինագծի քննարկումը: Aravot.am-ն այս կապակցությամբ հետաքրքրվեց՝ արդյոք սպայակազմն ունի՞ գերադասին դեմ գնալու ինքնուրույնությունը: «Սարդարապատ» շարժման նախաձեռնող խմբի անդամ Ժիրայր Սեֆիլյանը պատասխանեց. «Սպաներն ունեն իրենց երդմանը հավատարիմ մնալու պատասխանատվությունը, իրենց արյան պարտականությունը և կարող են շատ լավ հասկացնել, որ իրենք չեն խախտելու իրենց ազգային արժանապատվությունը, սահմանադրությունը, հավատարիմ են մնալու իրենց տված երդմանը»:
Մեր մյուս հարցին՝ կարելի՞ է մեկնաբանել, որ այս օրենքով իշխանությունները փորձում են իրենց պաշտպանել, ապահովագրել ժողովրդական որևէ ըմբոստությունից «Սարդարապատ» շարժման նախաձեռնող խմբի անդամ Գարեգին Չուգասզյանը պատասխանեց. «Ցանկացած երկիր կարելի է նմանեցնել բերդաքաղաքի, որտեղ բերդը ժողովրդին պաշտպանելու համար է: Սակայն կան պետություններ, որտեղ քաղաքը ծառայում է բերդին, և դրանք կոչվում են բռնակալություններ: Այսպիսով հայաստանյան իշխանությունները ոչ միայն այս օրենքով փորձում են պաշտպանվել ժողովրդից, այլև ավելին՝ մտադրված են ժողովրդին ծառայեցնել իրենց: Փորձ են անում ամբողջ քաղաքը հպատակեցնելու, քանի որ այն արդեն ապստամբված վիճակում է, ամբողջ երկիրն ուզում են գաղութի վերածել»:
Նույն հարցի կապակցությամբ Ժ. Սեֆիլյանը նկատեց. «Այս վարչախմբում տեղի է ունենում սերնդափոխություն, ինչի արդյունքում ավելի խելոք երիտասարդներ են երևան գալիս, բռնատիրոջ ավելի խելոք խորհուրդներ են տալիս: Եվ այս մրցակցության արդյունքում ծնվում են այսպիսի օրենքներ, որոնք պարզապես անհեթեթություն են»:
Տաթև ՀԱՐՈՒԹՅՈՒՆՅԱՆ
Կարդացեք նաև
