«Ազգային փոքրամասնությունները միշտ էլ իշխանամետ են լինում»,- Aravot.am-ի հետ զրույցում ասաց Հայաստանում ասորական համայնքի ղեկավար Արսեն Միխայելովը:Նրա խոսքերով, նախորդ տարիների փորձը ցույց է տվել, որ ասորիները ընտրությունների ժամանակ արագ կողմնորոշվում ու ընտրում են իշխանական կուսակցությանը. «Այս անգամ էլ պետք է, որ նույնը լինի, իշխանություններն այնպիսի լավ մոտեցում ունեն մեր նկատմամբ, որ չենք կարող դա անտեսել, իսկ եթե անտեսենք, նշանակում է կամ իրենք են սկսելու մեզ վատ աչքով նայել, կամ էլ՝ մենք իրենց»:
Եզդիների համայնքի ներկայացուցիչ Սիաբանդ Բաքոյանն էլ ասաց, որ իրենք առայժմ ուշադրությամբ հետեւում են նախընտրական զարգացումներին. «Ընտրարշավն արդեն սկսվել է, մեկը մյուսին քարկոծում են: Դեռ չենք ծանոթացել կուսակցությունների ծրագրերին, բայց կարծում եմ՝ ցանկացած երկրում ազգային փոքրամասնությունները պետք է իշխանամետ լինեն ու իշխանական: Հիմա իշխանական կուսակցություններ են եւ՛ հանրապետականները, եւ՛ Բարգավաճ Հայաստանը եւ մյուս բոլոր կուսակցությունները: Այս բոլորը կոչվում են կառավարություն: Մենք էլ կառավարությանն ենք սատարում »: Նա դժգոհեց, որ կուսակցությունների նախընտրական ծրարգրերը սկսվում ու ավարտվում են միայն նախըտրական խոստումների տեսքով.«Էդ ընտրված պատգամավորները գոնե մի քիչ ուշադրություն դարձնեն եզդիներին, ամբողջ հանրապետությունով սփռված ենք: Բոլորն էլ խոստումներ տալիս են…Օրինակ նախորդ ընտրարշավի ժամանակ Սերժ Սարգսյանը եկավ Թալինի շրջան, եզդիներին հավաքեց, խոստացավ, որ ջրատարներ կկառուցի ու կառուցեց, իսկ մնացած խոստումները երեւի ժամանակի հարց է»: Նա կոչ արեց մասնակցել ընտրություններին ու վստահեցրեց, որ նախորդ տարիների համեմատ այս տարի թափանցիկ ընտրություններ են անցնելու.«Թափանցիկությունը կախված է նաեւ ազգաբնակչությունից եւ ոչ այնքան պետական ապարատից, էդ որ ասում են կեղծիք-մեղծիք, սաղ սուտ է, լավ՝ թող կեղծեն 10,15 տոկոս: Ի վերջո բնակչությունը ե՞րբ պիտի սովորի ընտրակաշառք չվերցնել»:
Արփինե ՍԻՄՈՆՅԱՆ
