Ամեն տարի Երևանի պետական համալսարանը ապրիլի 25-ին իրականցնում է միջոցառում` նվիրված Հայոց ցեղասպանությանը: Այս տարին էլ բացառություն չէր: Ներկայացվեցին նոր մանրամասներ Հայոց ցեղասպանության պատմության վերաբերյալ, ցուցադրվեց ցեղասպանությունների պատմության մեջ առաջին` Հոլիվուդում 1918 թվականին նկարահանված «Հոշոտված Հայաստան» կինոնկարը: 80 րոպեանոց ֆիլմից թուրքերի ձեռքից հաջողվել է փրկել միայն 18 րոպեն: Այն թուրքերի կողմից իրականացված բարբարոսության մասին է, թե ինչպես են տանջամահ արվել կանայք, երեխաներ, ծերունիներ: Կինոնկարի գլխավոր հերոսուհին` 22 տարեկան մի աղջնակ, անձամբ եղել է Հայոց ցեղասպանության ականատեսը:
ԵՊՀ պատմության ֆակուլետի դեկան, պատմագիտության դոկտոր-պրոֆեսոր Էդիկ Մինասյանը «Առավոտ երիտասարդականի» հետ զրույցում նշում է, որ «Հոշոտված Հայաստանը» դեռ ոչ մի տեղ չի ցուցադրվել. «Ֆիլմը ձեռք է բերվել Հայոց ցեղասպանության պատմության թանգարանից: Պատմական վավերագրական փաստեր են: Մեր գլխավոր խնդիրը ցեղասպանության միջազգային ճանաչումն է: Այսօր այն կանգ է առել և 25 երկրներ չեն ընդունել, սակայն կարծում եմ, որ մեզ համար կա ավելի կարևոր հարց` հատուցման պահանջը: Պատմաբանների մասնակցությամբ միջազգային ատյաններում պետք է բարձրացվի ճանաչման և հատուցման հարցը»:
Պարոն Մինասյանը նկատում է, որ պատմության ֆակուլտետի ուսանողության մեծ մասը հետաքրքվրած է 1915 թվականին տեղի ունեցած ոճրագործությունով: Նրանք գալիս են ու տալիս իրենց հուզող հարցերը:
«Ի՞նչ խոսք, կան նաև այնպիսինները, ովքեր իրենց հետաքրքրությամբ զիջում են մյուսներին»,- ասում է դեկանը:
Պատմության ֆակուլտետի ուսանող Վանիկ Չալոյանը մտնում է հետաքրքրվողների շարքում: Հայոց ցեղասպանությամբ հհետաքրքրված է այնքան, որքանով որ պետք է հետաքրքրված լինի յուրաքանչյուր հայ: Պետք է ջանք ու եռանդ չխնայել ցեղասպանության միջազգային ճանաչման և համաշխարհային դատապարտման գործում. Վանիկի կոչն է բոլորին: Իր ասածը նա պատկերացնում է զանգվածային միջոցառումների անցկացմամբ ու այն միշտ հիշելով:
«Համոզված եմ` Թուրքիան ճանաչելու է Հայոց մեծ ցեղասպանությունը»,- ասում է ուսանողը:
Արամ Արարատյան
