«ԵԱՀԿ Մինսկի խմբի ձևաչափը փոխելու կարիք չկա: Այս հարցը դեռ չի քննարկվել: Մենք մտադիր չենք փոխել ձևաչափը, ԵԱՀԿ-ի և ԵՄ-ի դերերը տարբեր են այս հարցում», – ասել է Հարավային Կովկասի եւ Վրաստանի ճգնաժամի հարցերով Եվրամիության հատուկ ներկայացուցիչ Ֆիլիպ Լեֆորտը Ադրբեջանի դիվանագիտական ակադեմիայում: Հաղորդում է ադրբեջանական «ԱՊԱ» լրատվական գործակալությունը:
Նա նշել է, որ ԵԱՀԿ-ն ուղղակիորեն ներգրավված է պաշտոնական բանակցություններում, իսկ ԵՄ-ն աջակցում է երկկողմ հաղորդակցման հաստատամանը. «Գործընթացի մեջ ներգրավվածությունն ու փոխհաղորդակցությունը երկու կողմերի ժողովուրդների ընկալումը փոխելու գլխավոր տարրերն են և կարող են նպաստել հակամարտության լուծմանը: Իհարկե, փոխհարաբերությունները թույլ են այժմ»:
Հարցին, թե ինչպես են Հայաստանի և Ադրվեջանի կողմերը մասնակցում վստահության կերտման ԵՄ նախաձեռնություններին, Լեֆորտն ասել է, որ երկու կողմերն էլ դրական են տրամադրված այդ նախաձեռնություններին, բայց նրանք տարբեր մոտեցումներ ունեն. «Վստահության կառուցման հարցում Հայաստանը նախընտրում է անվտանգությունը, իսկ Ադրբեջանը ժողովուրդների միջև շփմանն է աջակցում»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
