Այսօր հրավիրված մամուլի ասուլիսում փաստաբան Վահե Գրիգորյանն իր մտահոգություններն արտահայտեց արդեն տասն ամիս շարունակվող նախաքննության վերաբերյալ:
Հիշեցնենք, որ ՀՀ նախկին արտգործնախարար Վարդան Օսկանյանին փողերի լվացման մեղադրանք ներկայացնելուց հետո ԱԱԾ-ն ստուգումներ սկսեց նաեւ «Սիվիլիթաս» հիմնադրամում:
Օրերս լրանում է նախաքննության տասն ամիսը, սակայն, փաստաբանի կարծիքով, քննչական մարմինները որեւէ բան բացահայտել չեն հաջողել: Նա տարակուսանք հայտնեց այն առիթով, որ նախաքննություն է գնում մի գործով, որով հիմնադրամի եւ նրա աշխատակիցների, նրանց գործունեության նկատմամբ կասկած հարուցող հարցադրումներ են առաջանում, մինչդեռ ԱԺ-ում`Վարդան Օսկանյանի անձեռնմխելիությունից զրկելու քննարկումներում, «Սիվիլիթասը» ներկայացվում էր արդեն կատարված գործողություններից տուժած կազմակերպություն:
«Մենք այսօր հայտարարում ենք, որ «Սիվիլիթաս» հիմնադրամը տուժում է նախաքննությունից, քանի որ քրեական դատավարության նպատակներին չի համապատասխանում, ավելի շատ համապատասխանում են «Սիվիլիթաս» հիմնադրամի՝ ԶԼՄ-ների արտահայտվելու վերաբերյալ, որպես քողարկված միջամտություն»:
Կարդացեք նաև
Այս գործընթացը, ըստ փաստաբանի, իրականացվում է օրենքի ձեւական կողմի պահպանմամբ, բայց, բովանդակային առումով նրա համար անհասկանալի է տասն ամիս ձգվող նախաքննության իրական նպատակը:
Ի դեպ, նախաքննության համար օրենքով սահմանված է «ողջամիտ ժամկետ» եզրույթը: Փաստաբանը դժվարանում է հստակեցնել` տասն ամիսը ողջամի՞տ ժամկետ է, թե`ոչ, մանավանդ, որ նախաքննությունը հստակություն չի կարողանում ապահովել:
Հիշեցնենք, որ ՊԵԿ-ը նույնպես ներգրավված է այս գործընթացում:
Վահե Գրիգորյանն ասում է, որ «ստուգումները շարունակվում են` անորոշության մեջ պահելով հիմնադրամի գործունեությունը»:
Թեեւ հիմնադրամը որեւէ խոչընդոտ չի հարուցել, բայց հարկային մարմինները շարունակաբար կասեցնում են իրենց ստուգումները:
Նելլի ԳՐԻԳՈՐՅԱՆ
