Չնայած Հայաստանը գնում է դեպի եվրաինտեգրում, բայց ներկայումս դեռ կան երևույթներ, որ զարմանք են առաջացնում և այդքան էլ ընդունելի չեն: Եվ եթե Եվրոպայում շունը համարվում է ընտանիքի անդամ, ապա Հայաստանում նա պարզապես կենդանի է, որը նույնիսկ կարող է վնաս տալ:
Տրանսպորտը լեփ-լեցուն էր, երբ հանկարծակի «Գազելը» կանգնեց և բարձրացավ մի երիտասարդ և կանչեց. «Գերման բարձրացիր»: Գերմանը, ի զարմանս ուղևորների, իր չափսերով աչքի ընկնող շուն էր: Եվ հանկարծակի խուճապ սկսվեց ուղևորների մոտ, հատկապես նրանց, ովքեր առանձնակի կերպով վախենում են շներից: Սակայն ի տարբերություն մարդկանց՝ շունը շատ հանգիստ էր, բարձրացավ, տեղավորվեց, հայացքն ուղղեց դեպի պատուհանը և շարունակեց իր ճանապարհը` անմիջապես երևում էր, որ Գերմանը սովոր էր այդպիսի ուղևորությունների:
Գերմանի տիրոջ խոսքերով՝ շունը ընդունակ չէ որևէ մեկին վնաս տալ. «Եթե իմանայի, որ ինչ-որ մեկին վտանգ կսպառնա, նման բան չէի անի: Ես պատասխանատվությունը վերցնում եմ ինձ վրա»:
Չնայած այս խոսքերին, ուղևորներից շատերը, միևնույն է, չփոխեցին իրենց վերաբերմունքը և ընթացքում Գերմանի ամեն շարժումը ուղեկցվում էր «վա~յ մամա ջան» կամ վախն արտահայտող այլ բացականչություններով: Եվ «Գազելի» ծայրահեղ լիքը լինելու փաստը հուշում էր միայն մի բան` «փախչելու տեղ չկա»:
Կարդացեք նաև
Կային նաև ուղևորներ, ովքեր ժպիտով ընդունեցին փաստը, շոյեցին շանը և տարբեր հարցեր էին տալիս տիրոջը, որի ընթացքում էլ պարզվեց, որ Գերմանը ճանապարհորդել է տարբեր տեղեր և նրա համար տրանսպորտով գնալը խաղ ու պար է:
«Տարբեր տեղեր ենք եղել և ամեն անգամ օգտվել ենք տրանսպորտային միջոցներից: Գերմանիայում, Ռուսաստանում, երբ շանս հետ տրանսպորտ էի նստում, մարդիկ ուրախանում էին և սովորական էին ընդունում: Միայն Հայաստանում է, որ այսպիսի արձագանքներ ենք ստանում»,-ասաց տերը:
Մարիամ ՄԿՐՏՉՅԱՆ
Լուսանկարը՝ https://zyalt.livejournal.com-ից
https://www.youtube.com/watch?v=GWN3km9KfxI&feature=youtu.be
Ահա և տեսանյութը…