Հանրակրթական դպրոցներում տարրական դասարանների աշակերտները բախվում են մի շարք հոգեբանական խնդիրների, որոնցից առավել հաճախ հանդիպողը դասապրոցեսին չհարմարվելն է: Մայիսի 2-ին հրավիրված ասուլիսում Խ. Աբովյանի անվան մանկավարժական համալսարանի տարիքային եւ մանկական հոգեբանության ամբիոնի դոցենտ Ռուբեն Պողոսյանը Aravot.am-ին փոխանցեց, որ հաճախ պատահում են դեպքեր, երբ տարրական դասարանների աշակերտները և հատկապես առաջին դասարանցիները, կես տարի դպրոց հաճախելուց հետո հրաժարվում են մասնակցել դասապրոցեսին, քանի որ նախկինում նրանք սովոր են լինում ազատ խաղին և երեխաների համար մեծ դժվարություն է դառնում 30 րոպե անընդմեջ հանգիստ նստելը:
«Այգ» հոգեբանական ծառայությունների կենտրոնի գլխավոր մասնագետ Ռուբեն Պողոսյանի խոսքով` ուսուցման գործընթացը կամա թե ակամա երեխայի համար վերածվում է «բռնության», ինչը հաղթահարելու համար նրան կարող են օգնել հմուտ մանկավարժները: «Երեխային պետք է օգնել, որպեսզի նա կարողանա հաղթահարել այդ դժվարությունները փուլ առ փուլ, ուստի` մանկավարժները պետք է լինեն հանդուժող, քանի որ իրենց վարվելակերպը անմիջականորեն կապ ունի երեխայի ապագա զարգացման եւ որպես մարդ ձեւավորման հետ»,-պարզաբանում է հոգեբանը:
Բանախոսը նշեց, որ տարրական դասարանների աշակերտների` ուսումնադաստիարակչական պայմաններին չհարմարվելը գիտական շրջանակներում վաղուց քննարկվող խնդիր է:
«Սա ոչ միայն գիտության, այլեւ մշակութաբանական խնդիր է: Ուսուցիչը պետք է հիշի, որ անգամ փոքր տարիքի աշակերտը մարդ է, անհատականություն, ում պետք է մոտենալ հարգանքով: Երեխայի ապրումները, արժեհամակարգը նույպես պետք է արժեւորվեն»,- ընդգծեց պարոն Պողոսյանը:
Կարդացեք նաև
Հոգեբանի փոխանցմամբ` պարբերաբար իրականացվում են հատուկ ուսումնական դասընթացներ մանկավարժներին վերապատրաստելու ուղղությամբ, սակայն կարեւոր է, որ յուրաքանաչյուր մանկավարժ գիտակցի իր առաքելության կարեւորությունը և նպաստի երեխաների ճիշտ հոգեբանության ձևավորմանը:
Անի Միրաքյան
