Ինչպես տեղեկացնում է Iditord.org կայքը, «Բարև Երևան» դաշինքը ահազանգ է ստացել, որ «Յուքոմ» ընկերությունն իր աշխատակիցներին հրահանգել է ընտրել Տարոն Մարգարյանին:
Aravot.am-ի հետ զրույցում «Յուքոմ»-ի կոմերցիոն տնօրեն Արամ Բարսեղյանը հերքեց տարածված տեղեկությունը և մանրամասնեց. «Նման բան Ձեզանից եմ լսում: Մենք ապաքաղաքական կազմակերպություն ենք, և որևէ մեկի շահերը չենք ներկայացնում: Ինձ թվում է՝ այդպիսի տեղեկություններ ժամանակ առ ժամանակ տարածվում են ավելի շատ քաղաքական պայքարին սրություն հաղորդելու համար, ինչը ինձ թվում է՝ անշնորհակալ գործ է: Պետք չէ խառնել սովորական տնտեսվարող սուբյեկտին քաղաքականությանը: Նման բան չկա, և առավել քան վստահ եմ, որ մենք այնքան շատ աշխատակիցներ ունենք, որ նրանց շարքում կան ամենատարբեր քաղաքական հայացքների տեր մարդիկ: Ու չեմ կարծում, որ այդ պարագայում նրանց կարելի է ստիպել ու հրահանգավորել: Իսկ եթե խոսքը այն մարդկանց մասին է, ովքեր հարում են այս կամ այն կուսակցությանը, և մեկը կարող է խնդրել ընտրել օրինակ՝ Արմեն Մարտիրոսյանին, մյուսը՝ Տարոն Մարգարյանին, կամ Արմեն Ռուստամյանին, ապա դա մեր իրավասությունից դուրս է, քանի որ յուրաքանչյուր ոք ունի ազատ ընտրության իրավունք, դա Սահմանադրությամբ է ամրագրված»:
Տաթև ՀԱՐՈՒԹՅՈՒՆՅԱՆ
