ՀՀ գյուղատնտեսության փոխնախարար Գառնիկ Պետրոսյանը եւ «Կանաչ արահետ» հ/կ-ի նախագահ Նունե Սարուխանյանն այսօր «Էկոլուր» մամուլի ակումբում քննարկում էին գենետիկորեն ձեւափոխված սերմերի Հայաստան ներմուծման խնդիրը:
Նունե Սարուխանյանի կարծիքով, այսօր Հայաստանում գենետիկորեն վերափոխված մթերքների հետ կապված մեծ վտանգ չկա, քանի որ նման սերմերի ներկրում գրեթե չկա: Սակայն իրենց կազմակերպությունն անհանգստացած է դեպի Հայաստան արտասահմանյան մի շարք հիբրիդների ներկրումով. «Շուկայում ներկայումս վաճառվում են հիբրիդներ, որոնք հիմնականում նախատեսված են պահածոների արտադրության համար: Դրանք ավելի չոր են, նաեւ զիջում են համային հատկանիշներով»:
Տիկին Սարուխանյանը հայտնում է, որ մի քանի օրենքներ են մշակվում՝ օրգանական գյուղատնտեսության եւ սերմերի մասին, որոնք քննարկման փուլում են. «Պետք է աշխատել ենթաօրենսդրական ակտերի վրա՝ կապված ներկրման եւ արտահանման հետ, որպեսզի հնարավորինս բացառվի գենետիկորեն մոդիֆիկացված մթերքների ներմուծումը»:
Գյուղատնտեսության փոխնախարարը հայտնում է, որ Հայաստանում սննդի անվտանգության ուղղությամբ որոշակի լուրջ քայլեր են իրականացվում՝ փորձելով կանխել գենետիկորեն ձեւափոխված օրգանիզմների ներմուծումը եւ օգտագործումը երկրում. «Մեր երկիրը սերմերի ներմուծումը կատարում է խիստ կանոնակարգված կերպով: Ներմուծվում են այն սերմացուները, որոնք գրանցված են մեր երկրում, եւ օգտագործման համար ունեն թույլտվություն»:
Կարդացեք նաև
Պարոն Պետրոսյանի կարծիքով պետք է հիմնական շեշտը դնել տեղական սորտերի զարգացման, տարածման եւ պահպանման վրա: Գյուղատնտեսության նախարարությունը ձեռնամուխ է եղել այս խնդրին:
Փոխնախարարը շտապում է տեղական մթերքներ նախընտրողներին ուրախացնել, ասելով, որ տեղական սորտերը չեն անհետացել, ընդհակառակը դրանք շարունակում են մշակվել եւ միայն բանջարաբոստանային մշակաբույսերի սելեկցիոն սերմնաբուծական կենտրոնի կողմից այս տարի վաճառվել է 115 կգ լոլիկի սերմ, որով հնարավոր է մինչեւ 700 հա սածիլ աճեցնել:
Պարոն Պետրոսյանը նշում է, որ շատ հաճախ հայ ֆերմերները ձեռք են բերում դրսից ներմուծված սորտեր, բայց սեփական կարիքների համար, իրենց տնամերձ տարածքներում մշակում են տեղական սորտերը: «Այստեղ կա երկկողմանի շահագրգռվածություն՝ արտադրողի եւ սպառողի: Արտադրողը դրսի սերմերը ավելի ընդունելի է համարում, որովհետեւ ինչ-որ չափով դրանք մեր տեղական սորտերին գերազանցում են՝ ավելի դիմացկուն են հիվանդությունների նկատմամբ»:
Նա նաեւ հայտնում է, որ տեղական ապրանքը ներկայումս շուկայում ավելի էժան է, քան ներմուծվածը: Սպառողը չի կարողանում զանազանել տեղական սորտի մթերքը ներմուծված մթերքից: Հույս ունի, որ կգա ժամանակ, երբ հայ սպառողը կկարողանա զանազանել տեղական սորտի լոլիկը: Եվ շուկայում այն ավելի բարձր արժեք կունենա, քան արտասահմանից ներկրվածը:
Փոխնախարարը նաեւ ներկայացրեց մի անվանացանկ, որտեղ ներկայացված էին տեղական լոլիկի, վարունգի , պղպեղի, սմբուկի, տարբեր այլ բանջարեղենների սորտերը, որոնք ամեն տարի կարելի է ձեռք բերել եւ օգտագործել:
Օֆելյա ՀՈՎՀԱՆՆԻՍՅԱՆ
