«Ազատագրենք հուշարձանը օլիգարխից» քաղաքացիական նախաձեռնության ակտիվիստների եւ ԱԺ պատգամավոր Սամվել Ալեքսանյանի աջակիցների հակամարտությունն այսօր կրկին «Ծածկած շուկայի» առջեւ էր:
Մաշտոցի պուրակից դրոշներով եւ «բոյկոտենք Yerevan City-ները» կոչերով դեպի Ծածկած շուկա եկող ակտիվիստներին՝ «Հեռացեք գրանտակերներ» ցուցապաստառներով դիմավորեցին տասնյակ կարմիր գլխարկներով կանայք եւ տղամարդիկ:
Հակամարտող երկու խմբերին բաժանում էին ոստիկանները:
Կարդացեք նաև
«Օրենքն արգելում է Ծածկած շուկայի ոչնչացումը, ինչն ասել է նաեւ մշակույթի նախարարը, որը փաստել է քաղաքապետը: Բոլորը հրապարակային հայտարարել են՝ Ծածկած շուկայի ոչնչացումը վանդալիզմ է: Վանդալիզմը քրեորեն պատժելի է: Կոչ ենք անում բոլոր գիտակից քաղաքացիներին բոյկոտել YerevanCity սուպերմարկետները»,- ասում էր նախաձեռնության անդամ Գեւորգ Սաֆարյանը: Նրան զուգահեռ Սամվել Ալեքսանյանի աջակիցները գոռում էին՝ «Հեռացեք» ու ծափահարում էին:
«Հավատացած եղեք, որ Փակ շուկան վերակառուցվել է եւ պատշաճ ձեւով վերադարձվել է մեր սիրուն մայրաքաղաքին եւ մեր համաքաղաքացիներին: Ուրեմն բոլորս միասին գոչենք՝ Փակ շուկա»,- հակառակ կողմի ակտիվիստներին զուգահեռ կոչ էր անում քաղաքագետ Սուրեն Սուրենյանցը:
Սոցիալիստական շարժման ղեկավար, Սամվել Ալեքսանյանի աջակիցներից Ռոբերտ Ահարոնյանն էլ ներկայացրեց «գրանտակերների» իր պատկերացումները. «Գրանտակերներն այն մարդիկ են, որոնք փորձում են Հայաստանում պայքարել աշխատատեղի համար: Գրանտակերները ձեր դիմաց կանգնած դեղին գլխարկներն են: Բոլորս միաձայն ասենք՝ հեռացեք այստեղից»:
Ակտիվիստ Գեւորգ Սաֆարյանն էլ հակադարձեց. «Եթե մեր պետական այրերը ի վիճակի չեն մեր հուշարձանները պաշտպանելու, ապա մենք` ինքներս կպաշտպանենք: Կոչ ենք անում բոլոր քաղաքացիներին դուրս գալ պայքարի եւ թույլ չտալ, որ մեր երկրում օլիգարխները քանդեն մեր երկիրը»:
Ավելի ուշ Ալեքսանյանի աջակիցներն անցան վիրավորանքների՝ «Վիժվածքներ եւ տականքներ» անվանելով ակտիվիստներին: Հետո սուլեցին ու կրկին պահանջեցին՝ հեռանալ:
Ոստիկաններին դիմած նախաձեռնության անդամները, որոնք պահանջում էին կարգի հրավիրել իրենց վիրավորող կարմիր գլխարկներին, ոստիկաններն այդպես էլ չարձագանքեցին: Նրանք պնդեցին, որ ոչ մի վիրավորանք չեն լսել, իսկ եթե ակտիվիստները լսել են, ապա պետք է ոստիկանական բաժանմունք գնան ու հաղորդում ներկայացնեն:
Արփինե ՍԻՄՈՆՅԱՆ
