«Ռուսները դաշնակիցների հաշվին իրենց խնդիրները լուծում են, ԱՄՆ-ն, ի տարբերություն, ասում է, թե շան որդի է, բայց մեր շան որդին է»,- այսօր «Պոստ սկրիպտում» մամուլի ակումբում հայտարարեց «Մոդուս Վիվենդի» կենտրոնի ղեկավար Արա Պապյանը՝ ամփոփելով 2013-ը:
Արա Պապյանն անդրադարձավ նաև Նուրսուլթան Նազարբաևի հայտարարությանը՝ Ղարաբաղյան հակամարտության պայմաններում Մաքսային միության սահմանների հստակեցման հարցին: Նա ասաց. «Մաքսային միությունում լուրջ դերակատարություն ունեցող երկու-երեք երկրներից երկուսը հանդես են եկել մեզ համար ոչ բարենպաստ հայտարարությամբ: Ուստի ելնելով այդ հայտարարություններից՝ վատ ակնկալիքներ ունեմ: Պուտինն էլ լռում է»:
Aravot.am-ի հարցին՝ այդ լռությունը վտանգավոր չէ՞, պարոն Պապյանը պատասխանեց. «Եթե հստակ դիրքորոշում չկա և կա զարգացումների հավանական երկու տարբերակ՝ լավ և վատ, ապա հաշվի առնելով հայի բախտը՝ հնարավոր են վատ զարգացումներ»:
Մաքսային միության անդամակցության դեպքում՝ պարոն Պապյանը լավ զարգացումներ չի կանխատեսում նաև ԼՂՀ-ի ճակատագրի վերաբերյալ.
Կարդացեք նաև
«Մինչև հիմա էլ հստակ պարզ չի ԼՂՀ-ի ճակատագիրը ՀՀ-ի՝ ՄՄ-ի անդամակցության դեպքում։ Մտահոգիչ հայտարարություններ կան, Նազարբաև, Լուկաշենկո, բայց հուսանք, որ ՀՀ-ի իշխանությունները կկարողանան ՀՀ-ի համար ընդունելի տարբերակ գտնել։ Բայց եթե մաքսակետ դրվի, դա ակնհայտ է, որ վերջնականապես կփակի ցանկացած դրական զարգացում մեզ համար Ղարաբաղի հարցում։ Սա անորոշ և բացական առումով միտում է»։
Պարոն Պապյանի համար անհասկանալի է նաև այս հարցում Ղարաբաղի իշխանությունների լռությունը:
Տաթև ՀԱՐՈՒԹՅՈՒՆՅԱՆ
