«Գործով մեղադրող դատախազը մնում է ազատության մեջ, պատասխանատվության գործողություններ նրա նկատմամբ չեն իրականացվում: Ավելին, անպատժելիության սկզբունքը թույլ է տալիս դատարանով արդարացված երիտասարդների հասցեին վիրավորական արտահայտություններ եւ զրպարտչական հայտարարություններով հանդես գալ, ՀՀ «արդար» դատարանների կողմից անպատիժ մնալ»,-Aravot.am-ի հետ զրույցում ասաց «Մատաղիսի գործով» արդարացված Արայիկ Զալյանը:
Արայիկ Զալյան
Նա տեղեկացրեց, որ մարտի 10-ին ՀՀ վճռաբեկ դատարանը վերադարձրել է իրենց ՝ դաժան սպանության մեջ մեղադրված, հետագայում արդարացված Արայիկ Զալյանի, Մուսա Սերոբյանի և Ռազմիկ Սարգսյանի բողոքը: Արդարացման դատավճիռը հրապարակվել էր 2012 թ. հունվարի 18-ին՝ ՀՀ Շիրակի մարզի ընդհանուր իրավասության դատարանում:
Նույն օրը մի քանի լրատվական կայքերի լրագրողների հետ զրույցում՝ այդ թվում նաեւ Aravot.am-ի, նախկին զինդատախազ, ԱԺ պատգամավոր Գագիկ Ջհանգիրյանն ասել էր. «Դրանք մարդասպաններ են և պետք է դատվեն, ես չեմ փոխել իմ կարծիքը»:
Գ. Ջհանգիրյանի դեմ պատվի եւ արժանապատվության հայցով հանդես եկան արդարացվածները. նրանք պահանջում էին վերականգնել իրենց բարի անունն ու համբավը:
Կարդացեք նաև
2013 թ. հունվարի 15-ին դիմել էին Արաբկիր և Քանաքեռ- Զեյթուն վարչական շրջանների ընդհանուր իրավասության դատարան, պահանջելով պատվին, արժանապատվությանը և գործարար համբավին պատճառված վնասի հատուցում և պարտավորեցնել Գ. Ջհանգիրյանին հայցվորներից հրապարակային ներողություն խնդրել: 2013 թ. հուլիսի 16-ին դատարանը մերժել էր հայցը, գնահատելով, որ. «Գ. Ջհանգիրյանի արտահայտություններում վիրավորական և զրպարտչական արտահայտություններ չեն եղել, նա արտահայտել է իր կարծիքը»:
2013 թ. սեպտեմբերի 16-ին Արայիկ Զալյանի կողմից ներկայացվել էր վերաքննիչ բողոք, սակայն 2013 թ. նոյեմբերի 27-ին ՀՀ վերաքննիչ դատարանը մերժել էր բողոքը:
2013 թ. դեկտեմբերի 26-ին Ա. Զալյանը վերաքննիչ դատարանի որոշումը բողոքարկել էր Վճռաբեկ դատարան: Բողոքաբերը դատարանից խնդրել էր ամբողջությամբ բեկանել ՀՀ վերաքննիչ դատարանի որոշումը և գործն ուղարկել նույն դատարան` այլ կազմով քննելու:
Ռուզան ՄԻՆԱՍՅԱՆ
