Այսօր ԱԺ պետաիրավական հարցեի հանձնաժողովի նիստում ՀԱԿ խմբակցության պատգամավոր Գագիկ Ջհանգիրյանը «Բռնությամբ կատարված հանցագործությունների զոհերին փոխհատուցման մասին» օրենքի նախագիծը նիստերի օրակարգում ընդգրկելու հարցի քննարկման ժամանակ դժգոհեց, որ կառավարությունը բացասական եզրակացություն է տվել: Նա ասաց, որ միջազգային կոնվենցիաներ կան նույն բովանդակությամբ, որոնք Սահմանադրական դատարանի դրական եզրակացությամբ մտել են վավերացման փուլ. «Եթե դուք նայեք կոնվենցիայի փաստաթղթերը, կտեսնեք, որ այն ժամանակվա արդարադատության նախարարը տվել է դրական եզրակացություն, ֆինանսների նախարարը գրել է, որ մենք այդ միջոցները չունենք: Դավիթ Հարությունյանին նշանակել էին նախագահի ներկայացուցիչ՝ այս կոնվենցիան վավերացնելու համար: Բա այս ձեր առարկությունները որտե՞ղ էին: Նույն կառավարությունը չի՞, նույն իշխանությունը չի՞, իրավահաջորդը չե՞ք նախորդի, հրաժարվո՞ւմ եք»:
«Ժառանգության» պատգամավոր Զարուհի Փոստանջյանը տեղից բղավեց՝ «պապաներից հրաժարվում են»: Ինչին արձագանքեց հանձնաժողովի նախագահ, ՀՀԿ պատգամավոր Հովհաննես Սահակյանը. «Զարուհի, մի խոսա, թե չէ ես ձեր պապաներին կանդրադառնամ»:
Հռիփսիմե ՋԵԲԵՋՅԱՆ
