Ագրարագյուղացիական միավորման նախագահ Հրաչ Բերբերյանը այսօր «Հենարան» ակումբում կոչ արեց Կենտրոնական բանկին սառեցնել գյուղացիներին արտարժույթով տրված վարկերը, քանի որ գյուղացին արտարժույթի տատանումների պատճառով գտնվում է անելանելի վիճակում։ Պրն Բերբերյանի խոսքով՝ կան գյուղացիներ, որոնք մեկ միլիոն դրամ գումար էին կուտակել, որպեսզի դեկտեմբեր ամսին վարկը մարեին եւ նոր վարկ վերցնեին, սակայն արտարժույթի բարձրացման պատճառով հիմա ստիպված են 25 տոկոս ավելի՝ մեկ միլիոն 250 հազար դրամ գումար մարել։
«Ւ՞նչ է կատարվում արտարժույթի հետ, երբ Կենտրոնական բանկը կուրծք ծեծելով ասում է, որ կկարգավորի, սակայն արտարժույթը գնալով բարձրանում է։ Դիմացը գարնանացան ունենք, իսկ գյուղացիներն էլ կոպեկ-կոպեկ այդ գումարները հավաքել էին։ Ո՞վ է այդ արտարժույթը Հայաստանից արտահանում»,-հետաքրքրվում է պրն Բերբերյանը։
Անդրադառնալով գյուղմթերքի շուկայում թանկացումներին, պրն Բերբերյանը նշեց, որ նման հարված Հայաստանի տնտեսությանը երբեւիցե չի եղել. «Այսօր գյուղացին իրավունք ունի ե՛ւ կարտոֆիլի, ե՛ւ կաթնամթերքի գինը բարձրացնել, սակայն ո՞ւմ հաշվին, մեր ժողովրդի՞։ Ես գտնում եմ, սրա պատասխանը ԿԲ-ն պիտի տա»։
Պրն Բերբերյանը վստահ է, որ արտարժույթի տատանումների պատճառով կթանկանան պարարտանյութերը, թունաքիմիկատները, սերմացուները. «Այն, ինչ գյուղացին գարնանը կուտակած ուներ, այսօր 25 տոկոսով արժեզրկվել է»։ Ըստ բանախոսի՝ այս կերպ հարվածել են մի բնագավառի, որը տնտեսության ողնաշարն է. «Շատ լավ կլիներ, որ գյուղացիների վարկերի 25 տոկոսը Կենտրոնական բանկը վճարեր»։
Կարդացեք նաև
Էլյա ՀՈՎՀԱՆՆԻՍՅԱՆ
