«Գրեթե բոլոր քրեակատարողական հիմնարկներում խտրականությամբ են վերաբերվում միասեռականներին»,- այսօր` դեկտեմբերի 26-ին, «Մեդիա կենտրոնում» լրագրողների հետ հանդիպման ընթացքում ասաց Քրեակատարողական հիմնարկներում եւ մարմիններում հասարակական վերահսկողություն իրականացնող հասարակական դիտորդական խմբի դիտորդ Սերգեյ Գաբրիելյանը:
Նրա խոսքերով` քրեակատարողական հիմնարկներում կան հատուկ խցեր, որտեղ պահվում են միասեռականները: Նա ընդգծեց, որ այդ խցերը գտնվում են անբարենպաստ վիճակում` կեղտոտ են, չեն ջեռուցվում, լուսավոր չեն: Դիտորդն առանձնացրեց «Կոշ» քրեակատարողական հիմնարկը` նշելով, որ այնտեղ միասեռականները եւ հետերոսեքսուալները նույն խցերում են պահվում:
«Միասեռականներին հանձնարարվում են ամենաստորացուցիչ աշխատանքները, այսինքն` մաքրել սանհանգույցները, հատակը, կոշիկները, աղբը: Նրանց անմարդկային ձեւով են վերաբերվում. Միասեռականները չեն կարող օգտվել նույն ճաշարանից, նույն սպասքից` նրանց համար առանձնացված է հատուկ սպասք, եւ սպասքը լինում է ինչ-որ նշանով: Հնարավոր է, որ հետերոսեքսուալ եւ միասեռական սեռական հարաբերությունը լինի, բայց գողական մտածելակերպից ելնելով, եթե հետերոսեքսուալը սեռական ակտի ժամանակ զբաղեցրել է տղամարդու դերը, ապա ինքը միասեռական չէ»,- ասաց Սերգեյ Գաբրիելյանը:
Ամի ՉԻՉԱԿՅԱՆ
