Նաիրիտցիները որոշել են չհեռանալ այնքան ժամանակ, մինչեւ որ կառավարությունը նրանց աշխատավարձերի պարտքերի մարման հստակ ժամանակացույց չսահմանի: Այս պահին «Նաիրիտ» գործարանի մի խումբ աշխատակիցներ կառավարության շենքի առաջ բողոքի ակցիա են իրականացնում: Ճիշտ է, նրանց բողոքին կառավարության աշխատակազմից արձագանքել են եւ նաիրիտցիներից 2 օր ժամանակ խնդրել` ուրբաթ օրը պատասխանելու պայմանով, բայց նաիրիտցիները որոշել են չհեռանալ:
«Ժամանակացույցի պահանջը կկատարեն՝ կգնանք, բայց այս պահին նրանց պատասխանի մեջ այդ մասին ոչ մի խոսք չկա»,-Aravot.am-ի հետ զրույցում ասաց «Նաիրիտ» գործարանի մամուլի քարտուղար Անուշ Հարությունյանը:
Այս պահին «Նաիրիտի» աշխատակիցներին պարտքը կազմում է 13-15 միլիոն դոլար: Այդ գումարը գոյացել է աշխատած 24 ամիսների համար:
Փետրվարի 6-ին «Նաիրիտի» 2200 աշխատակից աշխատանքից ազատվել է, որից 487-ի հետ կրկին պայմանագրեր կկնքվեն:
Կարդացեք նաև
Հիշեցնենք, որ Ամանորի տոներից հետո, երբ էներգետիկայի եւ բնական պաշարների նախարար Երվանդ Զախարյանն ամփոփում էր ոլորտի գործունեությունը, չբացառեց, որ հնարավոր է՝ «Նաիրիտը» վերագործարկվի: Նախարարը նաեւ հայտնել էր, որ ներկայումս նաիրիտցիների աշխատավարձերի վճարման բեռն իրենց վրա են վերցրել էներգետիկ ընկերությունները, մասնավորապես` «Երեւանի ՋԷԿ-ը»:
Լուսինե ԲՈՒԴԱՂՅԱՆ
