11 տարվա ազատազրկումը մնաց անփոփոխ
Կոտայքի մարզի ընդհանուր իրավասության դատարանի դատավոր Մխիթար Պապոյանն Աշոտ Խաչատրյանին դատապարտել էր տասնմեկ տարվա ազատազրկման:
Աշոտ Խաչատրյանի պաշտպանությունն իրականացնում էր ճանաչված փաստաբան Սեդա Սաֆարյանը, որը վերաքննիչ բողոք էր բերել:
Վերաքննիչ քրեական դատարանում օրեր առաջ ավարտվեց այս գործի քննությունը, եւ դատարանը անփոփոխ թողեց առաջին ատյանի դատարանի կայացրած դատավճիռը:
Աշոտ Խաչատրյանը մեղադրվում էր Նվեր Աբելյանի սպանության համար: Թե ամբաստանյալը, թե տուժողը, որը եղել է ամբաստանյալի քրոջ նախկին ամուսինը, գտնվել են մշապես լարված հարաբերությունների մեջ:
Կարդացեք նաև
Դատարանը հաստատված համարեց այն, որ 30.07.2013թ.՝ ժամը 11.40-ի սահմաններում, ամբաստանյալը հանդիպել է տուժողին Հրազդանի Միկրոշրջան թաղամասի 27 շենքին հարակից ճանապարհին: Տրվել է ընտանիքի անդամների հասցեին սեռական բնույթի հայհոյանքներ եւ սպառնալիքներ, իսկ տուժողը թքել է ամբաստանյալի վրա:
Ըստ գործի նյութերի, «թքելու համար վրեժխնդիր լինելու նպատակով», ամբաստանյալն իր անձնական օգտագործման «Մերսեդես Բենց» մակնիշի 30 ՕT 001 պետհամարանիշի ավտոմեքենայով հետեւելով եւ տեսնելով խաչմերուկում Նվեր Աբելյանին՝ նրա կայանած «Ֆոլքսվագեն Տուարեգ» մակնիշի 30 ԼՏ 394 պետհամարանիշի ավտոմեքենան, վերջինիս «ապօրինաբար կյանքից զրկելու դիտավորությամբ», մեծ արագությամբ, ավտոմեքենայի առջեւի մասով հարվածել է նրան, մեքենայի ընթացքի հետ տարել առաջ, բախվել կայանած «Ֆոլքսվագեն Տուարեգ» մակնիշի ԼՏ 394 պետհամարանիշի ավտոմեքենայի հետնամասին:
2 ավտոմեքենաների արանքում ճզմել էր տուժողին:
Նվեր Աբելյանը ստացած մարմնական վնասվածքներով տեղափոխվել էր «Հրազդանի Բժշկական Կենտրն» ՓԲ ընկերություն, ապա Երեւանի թիվ 1 համալսարանական հիվանդանոց:
Հիվանդանոցում նույն օրը՝ ժամը 23.35-ին, գիտակցության չգալով՝ նա մահացել էր:
Ի դեպ, վկաներից մեկը դատարանում հայտնել էր, որ վրաերթի նախորդող պահին ինքը ձայնային ազդանշան եւ արգելակման ձայն չի լսել: Վկան նկատել էր Նվերի մորը՝ տիկին Անահիտին, նրա փեսա Ռաֆայելին, ովքեր վազել են դեպի Նվերի կողմը:
Վկան տեսել էր, թե ինչպես է Նվերի մայրը վերցրել տղայի կտրված ոտքը եւ «անկանոն պտտվելով՝ բարձր գոռացել»:
Տուժողի իրավահաջորդի ներկայացուցիչն էր ՀՀ փաստաբանների պալատի անդամ Լիանա Գրիգորյանը:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
08.03.2015
