Իրավապաշտպան Ավետիք Իշխանյանի համար Սյունիքի մարզպետ Սուրիկ Խաչատրյանի որդու ձերբակալությունը անսպասելի նորություն էր:
«Ունենալով դառը փորձը՝ պետք է ասել, որ սա առաջին դեպքը, չէ, որ նրան ձերբակալել են: Բուդաղյանի սպանության դեպքով նա նույնպես ձերբակալվեց, բայց շատ կարճ ժամանակահատված հետո ազատ արձակվեց՝ որպես ինքնապաշտպանության փորձ…Ես շատ կուզենայի՝ սխալված լինեմ, ու իսկապես քննությունը ամեն ինչ պարզի, ու նա դատապարտվի: Բայց անպատժելիության այս մթնոլորտում, կարծում եմ՝ նա կրկին ազատ կարձակվի»,-Aravot.am-ին ասաց Ավետիք Իշխանյանը:
Հիշեցնենք, որ քննչական կոմիտեի հատկապես կարևոր գործերի քննության գլխավոր վարչության վարույթում Գորիսի «Սդղի գյոլ» կոչվող տարածքում Հարություն և Մուշեղ Զաքարյան եղբայրների նկատմամբ կիրառված բռնությունների դեպքի առթիվ քննվող քրեական գործով այսօր ձերբակալվել է Սյունիքի մարզպետի որդին՝ Տիգրան Խաչատրյանը:
«Չեմ ուզում անմեղության կանխավարկածը խախտել, բայց ներքին համոզվածություն ունեմ, որ այդ ծեծկռտուքի հիմնական կազմակերպիչն ու մեղավորը Տիգրան Խաչատրյանն է: Նրա ձերբակալումը, իհարկե, ինչ-որ բան նշանակում է, բայց դեռ ամեն ինչ չի նշանակում: Տեսնենք՝ ինչպես կընթանան գործողությունները, եթե զգանք, որ իսկապես, արդար քննություն է եղել, ու նա դատապարտվել է իր արարքի համար, այդ ժամանակ գուցե կարելի է եզրակացնել, որ Հայաստանում գուցե ինչ-որ բան փոխվում է: Առայժմ թերահավատորեն եմ մոտենում»,- հավելեց իրավապաշտպանը:
Կարդացեք նաև
Հիշեցնենք, որ մարզպետի որդին կասկածվում է ՀՀ քրեական օրենսգրքի 112-րդ հոդվածի առաջին մասով նախատեսված արարք կատարելու մեջ, այն է` Հարություն Զաքարյանին ծանր մարմնական վնաս պատճառելու մեջ:
Հիշեցնենք, որ ծեծկռտուքը տեղի էր ունեցել Գորիսի Սդղի Գյոլ կոչվող տարածքում: Հարություն Զաքարյանը կորցրել է աչքի տեսողությունը:
Արփինե ՍԻՄՈՆՅԱՆ
“իսկապես քննությունը ամեն ինչ պարզի, ու նա դատապարտվի ”
😀 😀 😀
լրիվ պլենդուզի մակարդակ ա…