yerakouyn.com. Ս.Օ.Խաչի «ՄԵՂՐԻ» մասնաճիւղի վարչութեան կազմակերպութեամբ՝ Ուրբաթ 9 Հոկտեմբեր 2015-ին, «Սարդարապատե սրահէն ներս տեղի ունեցաւ միջդպրոցական ձեռնարկ, մասնակցութեամբ Քեսապի երեք վարժարաններու՝ Ազգ. Ուսումնասիրաց Միացեալ ճեմարանի, Հայ Աւետ. Նահատակաց եւ Հայ Կաթողիկէ Բարեյուսոյ վարժարաններու աշակերտութեան, ներկայութեամբ Քեսապի հոգեւոր հայրերուն, թաղականութեան, միութիւններու ներկայացուցիչներուն, վարժարաններու տնօրէնութեանց, ուսուցչակազմերուն եւ ծնողներուն:
Օրուան հանդիսավար Թալին Ապտուլեան իր խօսքին մէջ ըսաւ, թէ հայ ժողովուրդը դարեր շարունակ ապրած է ցիր ու ցան, երբեմն պանդուխտ, աշխարհի չորս ծագերուն, բայց ուր որ ապրած է եղած է այդ երկրին հարազատ զաւակը, հաւատարիմ քաղաքացին ու շինարար տարրը: Նախ հիմնած է իր հաւատքի խորանը` եկեղեցին, ապա իր իմաստութեան տաճարը` հայ դըպրոցը:
Վարչութեան Փ. Ատենապետուհի Յասմիկ Սաղտըճեան բացման խօսքին մէջ անդրադարձաւ, թէ Ս.Օ.Խաչի «Մեղրի» մասնաճիւղը հաստատակամ քայլերով կը թեւակոխէ իր 85-ամեակը քայլ պահելով օրուան պահանջքներուն, դառնալով տիրական ներկայութիւն հայ գաղութէն ներս: Բնաբան ունենալով «ԺՈՂՈՎՈՒՐԴԻՆ ՀԵՏ, ԺՈՂՈՎՈՒՐԴԻՆ ՀԱՄԱՐ» ան իր մարդասիրական աշխատանքներուն կողքին, կը հանդիսանայ հայ ազգային եւ կրօնական տօներու վերարժեւորողն ու տարածողը, հայ մշակոյթի պահապան հրեշտակը:
Ընկերուհին անդրադարձաւ նաեւ հայ գիրերու գիւտի մեծասքանչներուն եւ թարգմանիչ վարդապետներուն, որոնք իրենց նուիրական աշխատանքին իբրեւ արդիւնք կնքեցին մեր ազգային ինքնութիւնը ու դարձան լուսեղէն տաճար հայ միտքին ու հոգիին: Ան եզրափակեց իր խօսքը ըսելով, թէ եզակի ազգեր են, որոնք կրցած են ոչ միայն գոյատեւել, այլ նաեւ իրենց արժէքաւոր տեղը ապահովել համաշխարհային քաղաքակրթութեան մէջ: Հայ ազգը փաստօրէն կը պատկանի այն փոքրաթիւ ժողովուրդներու փաղանգին, որ կրելով դարերու իրեն բաժին հասած ծանր բեռը, ամրակուռ կնիքը ձգած է համաշխարհային մշակոյթի եւ պատմութեան կերտումին մէջ: «Կարելի չէ արժեւորել մարդկային քաղաքակրթութեան մէջ հայ ժողովուրդին բերած նպաստը առանց արժեւորելու եւ գնահատելու հայ թարգմանիչները, որոնք հայ գիրերու գիւտով զինուած, իրենց տքնաջան աշխատանքով, հայ մարդուն առջեւ բացին ոչ միայն Աստուածաշունչ մատեանը այլ իրենց զոհողութեամբ հարթեցին ողջ ազգի մը յարատեւման ու գոյութեան լուսաւոր ճանապարհը»,- ըսաւ ան:
Կարդացեք նաև
Գեղարուեստական յայտագրին մասնակցեցան Քեսապի երեք վարժարաններու աշակերտները, որոնք իրենց քաղցրահնչիւն եւ հայաշունչ արտասանութիւններով եւ խմբերգներով փառաբանեցին Ս. Մեսրոպ Մաշտոցը եւ մեր թարգմանիչ վարդապետները ինչպէս նաեւ մեծարեցին հայերէն լեզուն եւ հայ դպրոցը:
Օրուան բանախօս Սալբի Թիթիզեան պատմական ակնարկով ներկայացուց Մեսրոպ Մաշտոցի, Սահակ Պարթեւի եւ բոլոր թարգմանիչ վարդապետներուն կատարած հսկայ աշխատանքը: Ան ըսաւ, որ Թարգմանչաց տօնը նշելով մենք կը տօնենք հայ լեզուի, գրականութեան, մշակոյթի, արուեստի եւ մեր լուսաւորիչներու յիշատակը: Հազարաւոր տարիներ անցան բայց անոնք կը շարունակեն ապրիլ, որովհետեւ ապրած են հաւատքով, գործով եւ անմահացնելու նպատակով:
Ան աւելցուց ըսելով. «Հայ ազգը կը դիմագրաւէ նորանոր մարտահրաւէրներ: Այս օրերուն Միջին Արեւելքը բարոյական անկայունութեան առջեւ է: Քաղաքակիրթ երկիրներու չափանիշները կը ներխուժեն մեր տուները: Մեր քրիստոնէական չափանիշները յարձակումի կ՛ենթարկուին: Մեր պարտականութիւնն է ապրիլ Թարգմանչաց փորձառութիւնը: Հայ դպրոցը Թարգմանչացի ամէնէն գեղեցիկ իրագործումներէն մէկն է, որ մենք պէտք ունինք առողջ մթնոլորտ մը ստեղծելու, որպէսզի հայ աշակերտը ստանայ հայեցի դաստիարակութիւն եւ կրթութիւն:
«Մենք, որպէս ծնողք եւ դաստիարակներ, պէտք է մեր զաւակներուն սորվեցնենք հայերէն երգը, երաժշտութիւնը, գրականութիւնը եւ հայկական պարը: Եկեղեցւոյ դերը կը կայանայ քրիստոնէական դաստիարակութեան ծրագիր հայթայթելով: Հայ լեզուն կը մնայ գոյապայքարի գլխաւոր զէնքը, իսկ հայ դպրոցը` ինքնապաշպանութեան ամրոցը»:
Ան եզրափակեց իր խօսքը հետեւեալ տողերով. «Թարգմանչաց Տօնը եւ մեր Ս. Թարգմանիչները այսօր ալ ներշնչման աղբիւր են ամէն հայու ամէնուրեք մանաւանդ ձեզի, սիրելի՛ աշակերտներ: Երանի թէ իւրաքանչիւրս պարտաւորութիւն զգայ բան մը աւելցնելու անոնց թողած կտակին վրայ կամ արժանաւոր ժառանգորդը հանդիսանայ անոնց թողած անժամանցելի աւանդին»:
Ձեռնարկը իր աւարտին հասաւ Արժանապատիւ Տ. Նարեկ քհնյ. Զերէնցեանի պատգամով եւ պահպանիչով:
Նայիրի Մելքոնեան, Քեսապ
