Տուժող Նարեկ Մանուկյանը հույս չունի, որ Սուրեն Սուրենյանցը պատասխանատվության կենթարկվի
Կենտրոն եւ Նորք-Մարաշ վարչական շրջանների առաջին ատյանի դատարանում նոյեմբերի 19-ին դատավոր Արմեն Բեկթաշյանի նախագահությամբ շարունակվում էր քաղաքագետ Սուրեն Սուրենյանցի գործի քննությունը:
Նիստին էր ներկայացել տուժող Նարեկ Մանուկյանը, որը նախորդ դատական նիստերին չէր մասնակցել, քանի որ իր պնդմամբ՝ Ռուսաստանի Դաշնությունում է եղել, նա նշեց, որ մի քանի օրից կրկին պատրաստվում է մեկնել ՌԴ: Նա նշեց, որ Սուրեն Սուրենյանցին Ռոբերտ Ահարոնյանի գրասենյակից է ճանաչում: Ծանոթանալուց մի քանի ամիս անց Ռոբերտ Ահարոնյանն իրեն ասել էր, որ Սուրեն Սուրենյանցը հնարավորություն ունի տանել արտերկրում ուսման, որի համար անհրաժեշտ է 700 դոլար: Նարեկ Մանուկյանն ասաց, որ 500 դոլար է փոխանցել, նա ընդգծեց, որ գումարը տվել է Ռոբերտ Ահարոնյանին, նա էլ փոխանցել է Սուրեն Սուրենյանցին՝ չնայած, որ երեքն էլ նույն սենյակում են գտնվել:
«Ուղղակի գիտեմ, որ քաղաքագետ է, եւ Ռոբերտ Ահարոնյանի ընկերներից է, այդքան բան եմ իմացել»,- ասաց նա:
Կարդացեք նաև
Տուժողը հավելեց, որ իմանալով կատարվածը, Ռոբերտ Ահարոնյանը վերադարձրել է իրեն գումարը, քանի որ ինքը պարտքով էր վերցրել, եւ հիմա պահանջում է, որ Սուրեն Սուրենյանցը այդ գումարը վերադարձնի Ռոբերտ Ահարոնյանին: Ամբաստանյալ Սուրեն Սուրենյանցը հայտարարեց, թե տուժողը ստում է, եւ դա փաստերով կապացուցի, նա ասաց, որ այլ Նարեկի համար է միջնորդվել եւ գումարը միանգամից վերադարձվել է:
Պատասխանելով մեղադրող Արթուր Մանուկյանի հարցին, թե արդյոք պնդո՞ւմ է իր բողոքը, ցանկանո՞ւմ է, որ Սուրեն Սուրենյանցը ենթարկվի քրեական պատասխանատվության, Նարեկ Մանուկյանը պատասխանեց. «Բողոքը պնդում եմ, բայց կոնկրետ գումարը ես ստացել եմ»:
Արթուր Մանուկյանը միջնորդեց ամբաստանյալի նկատմամբ դատական սանկցիա կիրառել նախազգուշացման տեսքով, քանի որ վերջինս փորձում է տուժողի վրա ճնշում գործադրել, մասնավորապես՝ տեղից ասելով՝ «լավ ինստրուկտաժ չեն արել»:
Արմեն Բեկթաշյանը հետաքրքրվեց, թե տուժողը ցանկանո՞ւմ է, որ ամբաստանյալը քրեական պատասխանատվության ենթարկվի, նա պատասխանեց, որ կուզեր, սակայն հույս չունի, քանի որ երկու տարի է անցել:
«Հույս չունեմ, որ պատասխանատվության կենթարկվի»,- ասաց Նարեկ Մանուկյանը:
Արմեն Բեկթաշյանը պատասխանեց. «Կրկես չի, ա՛յ տուժող»:
«Որ երկու տարվա ընթացքում ….»,- շարունակեց տուժողը, դատավորը թույլ չտվեց նրան ավարտել նախադասությունը՝ «Ո՞վ է ասում, որ 3 օրում պետք է ավարտվի»: «Ինչքան տեղյակ եմ, շատ շուտ է ավարտվում»,- պատասխանեց տուժողը: «Շատ սխալ ես տեղյակ, տուժո՛ղ, ավել-պակաս մի՛ խոսա, նստի՛ր»:
Ամի ՉԻՉԱԿՅԱՆ
