Այսօր կառավարության նիստից հետո լրագրողների հետ զրույցում առողջապահության նախարար Արմեն Մուրադյանը վստահեցրել է, որ H1N1 վիրուսից մահվան արդեն 18 դեպք է գրանցվել:
Aravot.am-ին նախարարության լրատվական ծառայությունից փոխանցեցին, որ այսպես ասած՝ խոզի գրիպից այսօր երկու կանայք են մահացել՝ 84 եւ 40 տարեկան: Ըստ նախարարության, մահացած կանանց մոտ մի շարք խրոնիկ հիվանդություններ են եղել, եւ նրանք բավականին ուշ են դիմել բուժօգնության, հիվանդանոց տեղափոխման առաջին իսկ օրվանից միացված են եղել արհեստական շնչառական ապարատին:
Նախարարի մամուլի քարտուղար Անահիտ Հայթայանն ասաց, որ 84-ամյա կինը մահացել է «Էրեբունի» բժշկական կենտրոնում, իսկ մյուսը՝ «Սուրբ Գրիգոր Լուսավորիչ»-ում:
«Էրեբունի» բժշկական կենտրոնի հասարակայնության հետ կապերի ղեկավար Շուշան Հունանյանն Aravot.am-ին վստահեցրեց, որ իրենց մոտ H1N1 վարակից մահ չի եղել: Հունանյանի այս պնդումը փոխանցեցինք Անահիտ Հայթայանին, որը լուրը ճշտելուց հետո մեզ կրկնին վստահեցրեց՝ 84-այմա կնոջ մոտ այսօր է հաստատվել H1N1:
Կարդացեք նաև
Սակայն Շուշան Հունանյանը առողջապահության նախարարության հայտարարությունից հետո կրկին պնդեց՝ «Այսօր «Էրեբունի» բժշկական կենտրոնում H1N1-ից մահվան դեպք չի եղել»:
Իսկ «Սուրբ Գրիգոր Լուսավորիչ» հիվանդանոցից մեզ տեղեկացրին, որ այսօր իրենց մոտ H1N1-ից երկու մահ է եղել. Մեկը՝ 74-ամյա Քնարիկ Սարգսյանն է, որն իրենց մոտ է տեղափոխվել «Էրեբունի» բժշկական կենտրոնից, մյուս մահացածը 42-ամյա կին է եղել: Երկուսն էլ ծայրահեղ ծանր վիճակում են եղել, ու նրանց մոտ հաստատվել է H1N1-ը:
Նելլի ԲԱԲԱՅԱՆ
