ՀՀԿ խմբակցության պատգամավոր Մարգարիտ Եսայանի կարծիքով՝ օբյեկտիվ չէ ԵԱՀԿ Մինսկի խմբի միայն ֆրանսիացի համանախագահին քննադատելը: Նշենք, որ այսպիսի քննադատությամբ էր հանդես եկել https://armlur.am/524400/ ԱՊՀ ինստիտուտի Կովկասի բաժնի ղեկավար, ռազմական հարցերով փորձագետ Վլադիմիր Եվսեևը: Նա «Ժողովուրդ» օրաթերթին տված հարցազրույցում մասնավորապես նշել էր. «Շատ կարևոր է Մինսկի խմբի յուրաքանչյուր համանախագահի աշխատանքը. օրինակ՝ ինձ թվում է, որ ֆրանսիացի համանախագահը կարծես թե այնքան էլ չի կատարում իր պարտականությունները»:
Կարդացեք նաև
Մարգարիտ Եսայանը Aravot.am-ի հետ զրույցում նկատեց, թե ներկայիս, մեղմ ասած, ոչ հանգիստ իրավիճակում քաղաքագետները, անշուշտ, կփորձեն Հռոմի պապից ավելի կաթոլիկ երևալ. «ԵԱՀԿ Մինսկի խմբի բոլոր համանախագահներն էլ հարցի խաղաղ կարգավորման համար համարժեք ու համապատասխան աշխատանք են իրականացրել մինչ այժմ և հիմա էլ շարունակում են: Չեմ կարծում, որ որևէ քաղաքագետ իրավունք ունի նման կարծիք հայտնել, քանի որ սա պայմանավորված գործող խումբ է, որտեղ բոլորն էլ իրենց ներդրումն ունեն հարցի կարգավորման հարցում. որևէ մեկն ավելի կամ պակաս չի աշխատում»:
Մեր հարցին՝ հետևաբար ռուս քաղաքագետի կողմից այս քննադատության ներքո ի՞նչ միտում տեսնել, տիկին Եսայանը պատասխանեց. «Այս պահին բանակցություններ իրականում չկան, Մինսկի խումբն, իհարկե, աշխատում է, քանի որ մենք միշտ էլ հայտարարել ենք, որ կողմ ենք հարցի խաղաղ կարգավորմանը, հիմա էլ նույնն ենք հայտարարում: Բայց տարբեր քաղաքագետներ այս օրերին տարբեր հայտարարություններ կանեն՝ իրարամերժ, իրար հակասող, մեկը մյուսի երկրին դեմ. բնական է, վիճակը լարված է, մեղմ ասած հանգիստ վիճակ չէ, և այս իրավիճակում ցանկացած քաղաքագետ պիտի փորձի Հռոմի պապից ավելի կաթոլիկ երևալ»:
Մեր դիտարկմանը՝ արդյոք Մինսկի խմբի գործունեությունը չպե՞տք է գնահատել եռանախագահների միասնական աշխատանքով, Մարգարիտ Եսայանը պատասխանեց. «Շատ ճիշտ եք նկատում, քանի որ սա միասնական աշխատանք է, և արդյունքն էլ երեք համանախագահների աշխատանքինն է, արդյունքի բացակայությունը՝ նրանց երեքի անհաջողությունը»:
Հետաքրքրվեցինք՝ շարունակո՞ւմ է կարծել, որ ԼՂ հակամարտության լուծման միակ ձևաչափն այս պահին Մինսկի խումբն է, պատգամավորը նկատեց, որ այդ հարցն արդեն ժամանակավրեպ է, քանի որ ընթանում են պատերազմական գործողություններ և եզրափակեց. «Այլ ձևաչափ այս պահին գոյություն չունի: Բայց այն իրավիճակում, երբ սահմանին պատերազմական գործողություններ են ընթանում, ամենաբարձր մակարդակով մենք հայտարարել ենք, որ որևէ բանակցություն չի կարող լինել, քանի դեռ նույն համանախագահ երկրները համարժեք պատասխան չեն տվել Ադրբեջանին ու նրան պարտավորեցրել դադարեցնել ռազմական գործողությունները: Քանի դեռ դա չկա, որևէ բանակցային սեղանի մասին խոսելն անիմաստ է»:
Տաթև ՀԱՐՈՒԹՅՈՒՆՅԱՆ
