«Բունդեսթագի այս որոշումը լուրջ բարոյական եւ հոգեբանական հարված էր թուրքական կողմին»,- հունիսի 6-ին «Դիալոգ» մամուլի ակումբում լրագրողների հետ հանդիպման ընթացքում ասաց Հայոց ցեղասպանության թանգարան- ինստիտուտի տնօրեն Հայկ Դեմոյանը:
Ըստ նրա, Բունդեսթագի որոշումից հետո Թուրքիային գրեթե մանեւրելու տեղ չի մնում Ցեղասպանության հարցում՝ թե՛ ակադեմիական դաշտում, թե՛ պատմաբանների հանձնաժողով հրավիրելու համար. «Այս հարվածը բավականին հուժկու էր թուրքական դիրքերին, որից, կարելի է ասել, գրեթե ոչինչ չի մնացել»:
Հայկ Դեմոյանը կարծում է, որ Թուրքիայի պաշտպանական գիծը չի կարող լինել այն, ինչ եղել է օրինակ՝ 5 տարի առաջ: Նա համարում է, որ կարող է լինել նոր մոդիֆիկացված տարբերակ՝ փափուկ ժխտողականություն. «Կարող ենք ասել, որ տասնամյակներ շարունակ մշակված, ներդրումներ կատարած ժխտողական քաղաքականությունից համարյա ոչինչ չմնաց այս որոշումից հետո: Պատճառները հասկանալի են՝ Գերմանիան, լինելով Առաջին աշխարհամարտի Թուրքիային դաշնակից երկրի իրավահաջորդը, փաստորեն փակեց մի շղթա: Դա մեղսակիցների շղթան էր՝ Ավստրո-Հունգարիան եւ Գերմանիան, որոնք այն ժամանակ կարող էին եւ ունեին այդ ներուժը՝ ոչ թե դադարեցնելու Ցեղասպանությունը, այլ թույլ չտալու»:
Նա ընդգծեց, որ Գերմանիան Եվրամիության շարժիչն է, եւ շատ երկրներ կարող են հետեւել Գերմանիայի այս օրինակին. «Որեւէ հակափաստարկ այստեղ չի աշխատի: Սա բարոյական եւ հոգեբանական լրջագույն պարտություն էր թուրքական ժխտողականությանը եւ թուրքական պետությանը, որը որ որդեգրել է այդ քաղաքականությունը վերջին մի քանի տասնամյակների ընթացքում»:
Կարդացեք նաև
Ամի ՉԻՉԱԿՅԱՆ