Հուլիսի 12-ին կայացավ Տավուշի մարզխորհրդի նիստ, ուր ի թիվս այլ հարցերի, մարզպետարանի աշխատակազմի քաղաքաշինության վարչության գլխավոր մասնագետ Միսաք Մելքումյանն անդրադարձավ Տավուշի մարզի համայնքներում «Հայաստանում հուղարկավորությունների մասին» օրենքի կիրարկմանը: Նա նշեց, որ այդ օրենքը Տավուշի մարզում ճիշտ ձեւով չի ընկալվում, սակայն համայնքի ղեկավարի պարտքն է պատշաճ ուշադրություն դարձնել թաղումների համար հատկացումներին, գույքագրելուն, վկայականներ տրամադրելուն, գերեզմանների խնամքին:
Մելքումյանը հայտնեց, որ Տավուշի համայնքներում, նույնիսկ քաղաքներում, չկան գերեզմանատները սպասարկող կազմակերպություններ եւ հավելեց . «Եթե գցենք՝ դա գործարարություն կլինի համայնքի համար, որը նաեւ կկանոնակարգի տվյալ ոլորտը»: Մարզպետ Հովիկ Աբովյանը Մ. Մելքումյանին առաջարկեց հստակեցնել ասվածը: Վերջինս ասաց, որ քաղաքային համայնքները պետք է գերեզմանատները սպասարկող կազմակերպություններ ունենան, ինչը օրենքի պահանջ է:
Ոսկան ՍԱՐԳՍՅԱՆ
