«Լուծումը փոխզիջման մեջ է: Իշխանությունը պետք է քայլ անի դեպի հասարակությունը: Ժողովուրդը նվաստացած է, աղքատացած եւ խեղճացած: Ընտրություններով հնարավոր չէ բան փոխել: Արդյունքը սա է: Երբ անընդհատ ամեն ինչ անտեսվում է, բաց է թողնվում, երբ մարդիկ արհամարհվում են, հիասթափվում եւ հուսալքվում, արդյունքում նման բան է լինում»,-«Երկու երես» մամուլի ակումբում այսօր խոսելով «Սասնա Ծռեր» խմբի զինված գործողությունների շարժառիթների մասին, ասաց երաժիշտ Եղիշե Պետրոսյանը:
Նրա խոսքով` «Սասնա ծռերին» երբեք ահաբեկիչ չի համարելու. «Ռոմանտիկ, ապստամբ տղաներ են…Սխալներ իհարկե կան: Ո՞նց կարելի է «դասական ըմբշամարտով» գնալ դրան…ըմբշամարտն ունի իր կանոնները: Եթե դիմացինդ «մարտ առանց կանոնների» է հետդ կիրառում, անընդհատ «դասական ըմբշամարտով» ես պատասխանելո՞ւ…Նրանք ցասումով այս քայլին գնացած տղաներ են: Նրանք իրենց կյանքերն են դրել զոհասեղանին: Իսկ ավելի թանկ բան մարդը չունի»:
Պետրոսյանի բնորոշմամբ` իշխանությունները գոնե պետք է գիտակցեն, որ շատ սխալներ են թույլ տվել եւ գնան փոխզիջման. «Շարունակվող «էսկալացիան» կխաթարի մեր երկիրը: Այստեղ ռոմանտիկ խաղեր չեն, երկու կողմն էլ վճռական են տրամադրված»:
Բանախոսը դժգոհեց ոստիկանների` ակտիվիստների հանդեպ գործողություններից` ասելով. «Մի՞թե դա սպասարկում է մեր անվտանգությունը»:
Կարդացեք նաև
Լուիզա ՍՈՒՔԻԱՍՅԱՆ
