«Իշխանությունն իրավունք չունի կարեւոր երեւույթի դեպքում անտարբեր լինել: Նրանք մարդիկ են, որոնց հարկ ենք վճարում նրա համար, որ աշխատեն եւ ճգնաժամային երեւույթների ժամանակ միջամտեն: Ի՞նչ է նշանակում` «չենք միջամտում, որ չխանգարենք»: Դա ինքնախոստովանություն է այն առումով, որ իշխանությունը վստահություն չունի ժողովրդի ներսում: Առհասարակ, չկա մի կառույց, որը ժողովրդի շրջանում վստահություն ունենա»,-«Անդրադարձ» մամուլի ակումբում այսօր խոսելով ՊՊԾ գնդի գրավման շուրջ ՀՀԿ խոսնակի հնչեցրած տեսակետների մասին, ասաց քաղաքագետ Արա Պապյանը:
Խնդրեցինք մեկնաբանել Շարմազանովի հայտարարությունն այն մասին, որ «Սասնա ծռեր» զինված խմբի` Սերժ Սարգսյանի հրաժարականի վերաբերյալ պահանջը կքննարկվի հարցի խաղաղ հանգուցալուծումից հետո: Արա Պապյանն այն «դիվանագիտական խուճուճ ձեւակերպում» որակեց, որի ասելիքը հետեւյալն է` «նախ թող հանձնվեն, հետո կտեսնենք` ինչ ենք անում»:
«Հրաժարականի հարց չեն քննարկելու, դա ակնհայտ է, բայց նախագահը կարող է մի քանի քայլ անել, օրինակ` սկսել գործողություններ` ընդդիմության կողմից որպես քաղբանտարկյալներ նշվող անձանց գործերը վերաքննելու եւ պատիժները վերանայելու ուղղությամբ: Հասարակությունը խիստ դժգոհություն ունի նաեւ բանակի ներսում կոռուպցիոն երեւույթների շուրջ: Արված փոփոխությունները բավարար չեն: Մի քանի պաշտոնյաներ եւ նախարարներ պետք է պաշտոնանկ արվեն»:
Լուիզա ՍՈՒՔԻԱՍՅԱՆ
