Հայաստանի կոմունիստական կուսակցության նախագահ Տաճատ Սարգսյանը զարմանում է ստեղծված քաղաքական դաշտի վրա: Այս մասին նա ասաց փետրվարի 17-ին լրագրողների հետ հանդիպման ընթացքում:
«Մարդիկ դաշինք են կազմում առանց գաղափարախոսության: Միայն եւ միայն հայտնվեն Ազգային ժողովում, մոտենան կերակրատաշտին, ուրիշ բան չկա եւ ժողովրդին գցում են թյուրիմացության մեջ: Ո՞նց կարող է երեկվա իշխանության մեջ կարեւոր դերակատարություն ունեցող անձնավորությունը մի օր հետո դառնա ընդդիմություն: Այդպիսի բան չի կարող լինել: Ո՞նց կարող է միանան երկու կուսակցություն, որոնց գաղափարախոսությունը լրիվ տարբեր է կամ ընդհանուր առմամբ գաղափարախոսության մասին կարծիք լինել չի կարող: Մենք դեմ ենք ե՛ւ նման ընդդիմությանը, ե՛ւ նման մարդկանց, նման կուսակցություններին, որոնք պետք է մասնակցեն ընտրություններին»,- ասաց նա:
Հայաստանի կոմունիստական կուսակցությունը արմատական պահանջ է ներկայացնում. «Պետք է փոխել աշխատաձեւը ե՛ւ տնտեսության, ե՛ւ գիտության, ե՛ւ գրի, ե՛ւ քաղաքականության կյանքում: Մենք ունենք ծրագիր, որը ներկայացրել ենք կառավարությանը: Ժամանակն է, որ տնտեսությանը ուշադրություն դարձնենք: Մեր հանրապետությունը տնքում էր արդյունաբերական ձեռնարկությունների տակ, մենք այնքան արդյունաբերական ձեռնարկություն ունեինք, որ աշխատողներ չունեինք, դրսից աշխատուժ էինք ներկրում»:
Տաճատ Սարգսյանը անդրադարձավ այն հարցին, թե ինչու երիտասարդները Կոմունիստական կուսակցությանը չեն անդամակցում. «Երիտասարդները մեզ մոտ չեն գալիս ոչ թե մեր գաղափարախոսության համար, այլ երիտասարդները ստիպված են գնալ այն մարդու, այն օլիգարխի մոտ, որը իրեն ընտանիքը պահելու համար հացի փող կտա: Կան շատ խելացի երիտասարդներ, որոնք քաջածանոթ են Կոմունիստական կուսակցության գաղափարախոսությանը, բայց միայն ու միայն հացի խնդիրը նրանց ստիպում է, որ գնան ուրիշ կազմակերպություններ»:
Կարդացեք նաև
Ամի ՉԻՉԱԿՅԱՆ
