«Այն, ինչ տեղի է ունեցել՝ մեր աչքի առջեւ է տեղի ունեցել՝ բռնաճնշումներ, ձերբակալություններ, հազար ու մի տեսակի մեղադրանքներ, արտաքին ուժերի ներկայություններ: Աննախադեպ պատմական զեղծարարության ընթացք էր»,- այսօր լրագրողների հետ զրույցում ասաց Բագրատ սրբազանը՝ անդրադառնալով հունիսի 7-ի խորհրդարանական ընտրություններին:
«Մարդիկ իշխանություն կորցնելու ու դրանով պայմանավորված շատ բան կորցնելու առաջ են կանգնած, հատկապես պատասխանատվության, որից անընդհատ խուսափում են:
Այդուհանդերձ ես համարում եմ, որ սա եւս մեկ քայլ առաջ էր այս չարիքի իշխանությանը հեռացնելու համար: Մի նայեք, թե 49 տոկոսն ինչ եղավ, դա ինչպես է ձեռքբերվել, հետո կպարզվի, թեեւ արդեն պարզվում է ընթացքում: Տարբեր քաղաքական ուժեր վեր են հանում, բայց որ փաստացի մեր ժողովրդի 51 տոկոսը մերժել է այս մարդկանց, իրենց տարբեր ծրագրեր, փաստ է: Գլուխ էին գովում ժամանակին, որ 65 տոկոս պետք է հավաքեն, ձախողեցին»:
Կարդացեք նաև
Բագրատ սրբազանը նաեւ ասաց, որ ընդդիմադիր քաղաքական ուժերն ու ընտրազանգվածը չպետք է հուսախաբ իրենց զգան. «Հուսախաբության առիթ կա, ակնկալիքները մեծ էին, եռում էր ամեն ինչ ու նպատակին կարծես չեն հասնում, բայց առաջիկա ընթացքը ցույց կտա: Սա շարունակական պայքար է, մեկ փոքր ժամանակահատվածով սահմանափակված չէ»:
Արփինե ՍԻՄՈՆՅԱՆ
