Տարածքային կառավարման եւ զարգացման նախարար Դավիթ Լոքյանն (ՀՅԴ) այսօր Հայ հեղափոխական դաշնակցության նախընտրական ծրագրի ներկայացման ժամանակ անդրադարձավ վերջինիս տնտեսական բաղադրիչին: Ասաց, որ ՀՅԴ-ի պայքարն ուղղված է լինելու ՀՆԱ-ի աճին, քաղաքացիների եկամուտների ավելացմանը եւ ներքին համերաշխության ապահովմանը. «Ոչ մի երկրում չի լինում ներքին համերաշխություն, երբ կա եկամուտների լուրջ անհավասարություն»:
Լոքյանի բնորոշմամբ՝ ՀՅԴ-ի առաջիկա հինգ տարիների գերակա խնդիրը տնտեսությունը հզորացնելն է: «Վերջին ամիսներին քաղաքական ղեկավարությունը որդեգրել է մի ուղղություն, որը ՀՅԴ հիմնաքարերից է՝ ազատ շուկայական հարաբերություններ, պետության մասնակցություն մասնավոր տնտեսական հատվածում: Փուլային ճանապարհով պետք է լուծել տնտեսական խնդիրները: Դրամավարկային քաղաքականությունը խնդրահարույց է մնում: Չի կարելի արագ զարգանալ առանց բանկային համակարգի գործունեության կարգավորման: Դրամական միջոցների դեֆիցիտ կա, որի հետեւանքով էլ վարկային տոկոսները բարձր են: Այդպես հնարավոր չէ գործարարությամբ զբաղվել: Մեր ծրագրային առանցքն ՝ օգտագործել բոլոր միջոցները, որպեսզի մարդը կարողանա միջոցներ ունենալ տնտեսություն վարելու համար»,-վստահեցրեց Դավիթ Լոքյանը:
Նախարարը հավելեց. «Առաջիկա հինգ տարիներին հինգ եւ ավելի տոկոս տնտեսական աճ կունենանք»: Բնապահպանության նախարար (ՀՅԴ) Արծվիկ Մինասյանն էլ իր հերթին հայտարարեց, որ ՀՅԴ ծրագիրը նախատեսում է հակակոռուպցիոն մարմնի ստեղծում՝ բաղկացած հասարակության բոլոր շերտերի ներկայացուցիչներից:
«Հասնելու ենք նրան, որ բնական ռեսուրսները եւ ընդերքը որպես համաժողովրդական սեփականություն՝ ծառայեն մեր ժողովրդին»,-համոզմունք հայտնեց Արծվիկ Մինասյանը:
Կարդացեք նաև
Լուիզա ՍՈՒՔԻԱՍՅԱՆ
