Այսօր վարչապետ Նիկոլ Փաշինյանը ՊԵԿ նախագահի հետ Արարատյան մաքսատուն-վարչության ավտոմաքսատուն այցից հետո Դավիթ Անանյանին հանձնարարել է միջոցներ ձեռնարկել ավտոմաքսատունը Երեւանից Գյումրի տեղափոխել:
Թե ինչու է նման բան անցել վարչապետի մտքով, դժվար է կռահել. նա չի մեկնաբանել իր հանձնարարությունը:
Արդյոք նման անհրաժեշտություն կա, թե՝ ոչ: ՊԵԿ-ից մեր այս հարցին խոստացան ավելի ուշ պատասխանել:
Թեեւ վարչապետն իր հայտարարության մեջ չի նշել, թե կոնկրետ որ ավտոմաքսատունը տեղափոխեն Գյումրի, սակայն, նա այսօր Նորագավիթ ավտոտրանսպորտային միջոցների մաքսային ձեւակերպումների մաքսատանն է եղել, ուստի ենթադրվում է խոսքը հենց այդ մաքսատան մասին է:
Կարդացեք նաև
Դեռ անցյալ տարի ՊԵԿ-ը հայտարարություն է տարածել, ըստ որի, 2018-ին Հայաստան է ներկրվել 62,5 հազար ավտոմեքենա, նախկինում տարեկան 40 հազար ավտոմեքենա էր ներմուծվում: Այդ հայտարարության մեջ նաեւ ասվում է՝ «Արարատյան մաքսատուն-վարչության թիվ 2 բաժնի (ավտոմաքսատուն) ենթակառուցվածքը նախատեսված չէր նման ծավալների ծառայություն մատուցելու համար, ինչը եւ հանգեցրել է հավելյալ հերթերի եւ կուտակումների»: ՊԵԿ-ը վստահեցրել է, որ աշխատում է խնդրին համալիր լուծում տալու ուղղությամբ: Բայց մինչ խնդրին լուծումը, կոմիտեն հանձնարարել է՝ ավտոմեքենաների մաքսային ձեւակերպումներն, առանց բացառության, կարող են իրականացվել բոլոր մաքսատներում եւ մաքսային կետերում:
«Փաստացի վերացվել է մաքսային ձեւակերպումների մասնագիտացված/կենտրոնացված համակարգը եւ ներմուծողի ցանկությամբ ավտոմեքենաների մաքսային ձեւակերպումները կարող են կատարվել ՀՀ-ում գործող 5 մաքսատներից եւ 6 մաքսային կետերից ցանկացածում»:
Որոնք են ՀՀ-ում գործող այդ 5 մաքսատներն ու 6 մաքսակետերը: Ուսումնասիրելով ՊԵԿ-ի կայքը, պարզեցինք՝ օրինակ Շիրակում ավտոմեքենաների ձեւակերպման համար կա 3 հնարավորություն՝ հյուսիսային մաքսատունը, եւ 2 մաքսակետերը: Հյուսիսային մաքսատունը գտնվում է Գյումրիում, 1 մաքսակետ է գործում Շիրակ օդանավակայանում եւ 1 մաքսակետ էլ Բավրային է:
Իսակովի պողոտայում գտնվող հանրահայտ Արարատյան մաքսատունն ու Նորագավիթի մաքսատունը, հիմնականում Երեւանի բնակիչներին են սպասարկում: Ընդ որում, Երեւանի բնակիչներին կարող է եւ պետք է սպասարկի նաեւ Զվարթնոցինը:
Արեւելյան մաքսատունը Լոռու մարզի Վանաձոր քաղաքում է: Լոռիում է նաեւ Գոգավան-Պրիվոլնոյե մաքսակետը: Արեւելյան մաքսատան ենթակայությամբ է նաեւ Այրում-Ջիլիզայի մաքսային կետը՝ Այրումում, իսկ մյուսը՝ Բագրատաշենի մաքսակետն է: Հարավային մաքսատունն է Սյունիքի մարզի Սիսիան քաղաքում է, այս մարզում է գործում նաեւ Մեղրիի մաքսային կետը:
Կարծես թե հանրապետության «5 անկյուններում» կան մաքսատներ ու մաքսակետեր, որպեսզի տարբեր մարզի բնակիչներն իրենց բնակավայրին հնարավորինս մոտ կատարեն ավտոմեքենային մաքսային ձեւակերպումները:
Սակայն, Երեւանից Գյումրի մաքսակետ տեղափոխելու հիմքում պետք է մի ուսումնասիրություն լինի՝ հաշվի առնելով բնակչության թիվն ու ներմուծման ուղղությունները:
Ավտոներկրող եւ պարբերաբար մաքսային ձեւակերպումների մեջ «թրծված», «Ղեկը աջ» նախաձեռնության անդամ Դավիթ Գասպարյանն Aravot.am-ի հետ զրույցում Փաշինյանի հանձնարարության մասին ասաց՝ «Բայց ինչո՞ւ տեղափոխել, Գյումրիում արդեն կա մաքսատուն»: Գասպարյանը վստահ է՝ եթե Երեւանի տարածքում չլինի ավտոմաքսազերծման «տերմինալ», դա բարդություններ կառաջացնի. «Որովհետեւ ավտոմեքենա ներկրողները Երեւանում ավելի շատ են, քան Գյումրիում: Այս մարդիկ ստիպված Երեւանից պետք է գնան հասնեն Գյումրի՝ մաքսազերծեն ու հետ վերադառնան: Ընդ որում, նրանք այդ գործողությունը մի անգամ չեն անում, պարբերաբար նման գործողությունների մեջ են»:
Ավտոմեքենաներ ներկրողները ինչո՞ւ Զվարթնոցում չեն անում մաքսային ձեւակերպումներ. Գասպարյանն ասաց՝ «Մենք ձեռքբերման «ինվոյսներով ենք» մաքսազերծում Նորագավիթում: Ես չեմ եղել, բայց մեր գործընկերներն ասում են՝ Զվարթնոցում ավելի բարդ է ու հավելյալ փաստաթղթեր են պահանջում, իսկ Նորագավիթում ավելի հեշտ է լինում»:
Գասպարյանի կարծիքով՝ եթե խնդիրը Գյումրիում ծանրաբեռնվածությունը թեթեւացնելն է, ապա կարելի է նոր մաքսատուն բացել այնտեղ, ոչ թե Նորագավիթինը տեղափոխել այնտեղ. «Բայց նախ հասկանանք՝ ո՞րն է նպատակը, ի՞նչ ենք ուզում անել, հետո հասկանանք ինչ ճանապարհներով ենք լուծելու եւ ինչ արդյունքներ կստանանք: Ես կարծում եմ՝ եթե Նորագավիթի մաքսատունը տեղափոխենք՝ լավ արդյունքի չենք գա»:
Նելլի ԲԱԲԱՅԱՆ
