Ըստ մեր աղբյուրների՝ այս պահին հանրապետության բոլոր քրեակատարողական հիմնարկներում ուժեղացված ծառայություն է։ Բոլոր ստորաբաժանումների աշխատակիցները՝ վարչակազմի անդամներով տեղում են։
Պատճառը՝ «Նուբարաշեն» ՔԿՀ-ում սկսված անկարգություններն են։ Ըստ մեր աղբյուրի ՔԿՀ-ի 39-րդ խցում պատիժը կրող «զոն նայող» Նվեր Կիրակոսյանը հայտարարել է, որ նոր օրենք են ընդունում, ըստ որի ինքը «էլ ասող չի», եւ հրահանգել անել այն, ում մտքով ինչ անցնում է։
Մեր աղբյուրը հերքեց, որ քրեակատարողական ծառայության հատուկ ջոկատայինները «Նուբարաշեն»-ում են։ Ի դեպ, բոլոր ՔԿՀ-ներում փորձում են մեկուսացնել «զոն նայող» հեղինակություններին՝ նրանց պատժախուց տանելով։
Տեսակետ կա, որ ՔԿՀ-ներում «զոն նայողները» դիտավորյալ անկարգություններ են ստեղծում, որպեսզի Ազգային ժողովը չընդունի «քրեական հեղինակությունների» նկատմամբ պատժամիջոց սահմանելու օրինագիծը։
