«Մամուլից տեղեկացա, որ ԵՊՀ ռեկտորի պաշտոնի հավակնորդ է ԵՊՀ ռեկտորի ժամանակավոր պաշտոնակատար Գեղամ Գեւորգյանը, որն «ԷվոկաԲանկ»-ի խորհրդի նախագահի տեղակալն է: Այստեղ տեսնում ենք անձի շահերի բախման դասական օրինակ: Կոռուպցիան պոզով-պոչով է լինո՞ւմ»,-ԱԺ նիստում այսօր հայտարարեց «Լուսավոր Հայաստան» խմբակցության պատգամավոր Աննա Կոստանյանը՝ դիմելով իշխող «Իմ քայլը» խմբակցությանը:
Նա նշեց. «Տեղեկացա նաեւ, որ հունվարին ԵՊՀ լրատվական վարչության ղեկավար Գեւորգ Էմին-Տերյանը հարցաքննվել է Գեղամ Գեւորգյանի կողմից, որը սպառնացել է «կտրել ռեկտորի փողից»՝ այն պատճառով, որ վարչության աշխատակիցը որեւէ օրաթերթում հոդված է տպագրել ռեկտորի պաշտոնակատարի՝ մասնավորում աշխատելու վերաբերյալ: Ի՞նչ ասել է «ռեկտորի փող»: Պարզվում է՝ ԵՊՀ տարեկան բյուջեում կետ կա՝ հեռակա ուսուցման վարձավճարներից վարչական ծախսերի համար նախատեսված գումարի բաշխում: Դա 85 հոգու համար տարեկան նախատեսում է 70 միլիոն դրամ: Հիմա ռեկտորի պաշտոնակատարը որոշել է վրեժ լուծել եւ կտրել է լրատվական վարչության ղեկավարի հատկացումը»:
Աննա Կոստանյանը շարունակեց. «Պարզվում է նաեւ, որ վարչության ղեկավարի դասավանդած առարկան՝ «Վահան Տերյանը եւ հայ գրականությունը», հանվել է հայ բանասիրության ֆակուլտետի մագիստրատուրայի ծրագրից: Հարգելի իշխանություն, եթե ԵՊՀ-ում կատարվող այս իրողություններին կա խելամիտ բացատրություն, բարձրաձայնեք այդ մասին»:
Կարդացեք նաև
Լուիզա ՍՈՒՔԻԱՍՅԱՆ
