«Մեդիա կենտրոնի» առցանց մամուլի ասուլիսում այսօր ՀՀ առողջապահական եւ աշխատանքի տեսչական մարմնի՝ աշխատողների առողջության պահպանման եւ անվտանգության ապահովման վերահսկողության վարչության պետ Աշոտ Հարությունյանը ներկայացրեց այն ուղեցույցը, որը տեսչական մարմինը ներկայացրել է արտակարգ դրության պարետ Տիգրան Ավինյանին, նա էլ հրապարակել է դրանք: Հարությունյանի փոխանցմամբ՝ ուղեցույցում մասնավորապես ամրագրված է (մեջբերումները՝ մասնակի):
-Կազմակերպություններն իրենց աշխատողների համար աշխատանքի անվտանգ կազմակերպման նպատակով պետք է ապահովեն պայմաններ՝ ձեռքերի կանոնավոր և մանրակրկիտ լվացման, չորացման համար, պետք է ապահովեն ջրի և օճառի, ալկոհոլային հիմքով ձեռքերի ախտահանիչների, եռաշերտ դիմակների, ձեռնոցների առկայությունը:
-Կազմակերպությունները յուրաքանչյուր աշխատակցի ջերմությունը պետք է չափեն օրական նվազագույնը երկու անգամ, իսկ առնվազն երկու անգամ սահմանված ժամերի պետք է ախտահանեն տարածքը՝ դռների բռնակները, սեղանները, ձեռքով հաճախակի հպման մակերեսները, սանհանգույցները, ձեռքերի հպման համար նախատեսված մակերեսները:
-Ախտահանման համար պետք է կիրառել քլորի հիմքով կամ 60-80% սպիրտ պարունակող ախտահանիչ նյութեր:
Կարդացեք նաև
-Պետք է ապահովել աշխատատեղերի՝ միմյանցից նվազագույնը 2 մետր հեռավորությունը եւ սահմանափակել ներգնա և արտագնա գործուղումները, հարգելի համարել սուր շնչառական վարակներին բնորոշ ախտանշաններով (թեթև հազ, ջերմության բարձրացում) աշխատակիցների բացակայությունն աշխատանքից, բացառել վերջիններիս մուտքը աշխատավայր, իսկ եթե ախտանիշներն ի հայտ են գալիս աշխատանքի ընթացքում՝ անհապաղ հայտնել ՀՀ առողջապահության նախարարություն և ապահովել աշխատակցի մեկուսացումը։
-Աշխատավայրում վիրուսով ախտահարված աշխատակից ունենալու մասին տեղեկատվություն ստանալու դեպքում պետք է անհապաղ առանձնացնել այն անձանց շրջանակը, ովքեր շփում են ունեցել վարակակիր անձի հետ և հայտնել ՀՀ առողջապահության նախարարությանը։ Վարակի կասկածով աշխատակից ունենալու դեպքում պետք է զանգահարել Առողջապահության նախարարության թեժ գիծ, հնարավորության դեպքում՝ անմիջապես ախտահանել այն տարածքը, որտեղ աշխատել է աշխատակիցը, ինչպես նաև ցանկացած այլ տարածք և մակերես, որը կարող էր հասանելի լինել տվյալ աշխատակցին։
Աշոտ Հարությունյանը հայտնեց, որ տեսչական մարմինն այս ուղեցույցն ավելի քան 250 կազմակերպությունների է ուղարկել, նաեւ՝ հ/կ-ներին, արհեստագործական միություններին, եւ ցուցումները խախտողները պատասխանատվության կենթարկվեն. «Խանութներում սպասարկողներն անպայման պետք է կրեն դիմակներ, նման պահանջ կա, եւ մեկ մետր հեռավորություն պահպանեն հաճախորդներից: Տեսչական մարմինը շատ զանգեր է ստանում: Մարդիկ անհանգստացած են, շատ հարցերով են դիմում, մենք էլ խորհրդատվություն ենք տալիս, նաեւ՝ վարչական վարույթներ հարուցում»:
Հիշեցնենք, որ ՀՀ-ում կորոնավիրուսի տարածումը կանխելու նպատակով հաստատված է արտակարգ դրություն:
Լուիզա ՍՈՒՔԻԱՍՅԱՆ
