Վիտամիններով հարուստ այս ուտեստը կարող եք պատրաստել ե՛ւ որպես սննդարար նախաճաշ եւ որպես լիարժեք ճաշ կամ նույնիսկ՝ ընթրիք: Բացի օգտակար եւ հագեցնող լինելուց՝ նաեւ շատ համեղ է:
Անհրաժեշտ մթերքները
Ծնեբեկ- 10-15 ճյուղ
Բրոկոլի-1 փոքրիկ գլուխ (200 գրամի չափ)
Կարդացեք նաև
Կանաչ լոբի- 200-300 գրամ
Կանաչ սոխ- 5-6 ճյուղ
Թարմ, կանաչ սխտոր-1 ճյուղ
Խառը կանաչիներ՝ սամիթ, համեմ, մաղադանոս- կես կապ
Ձու- 5 հատ
Պանիր – 50 գրամ
Կարագ-50 գրամ
Բուսական յուղ-4 ճաշի գդալ
Համեմունքներ՝ ըստ ճաշակի
Պատրաստման եղանակը
Նախ մաքրեք եւ շատ լավ լվացեք բոլոր բանջարեղեններն ու կանաչիները: Կաթսայի մեջ ջուր լցրեք եւ դրեք կրակին, հենց եռա, 1 ճաշի գդալ աղ արեք եւ հերթով խաշեք բանջարեղենը՝ բրոկոլին, լոբին եւ ծնեբեկը: Բրոկոլին եւ ծնեբեկը՝ 2-3 րոպեից ոչ ավելի, իսկ լոբին՝ մոտ 5 րոպե: Յուրաքանչյուր տեսակը արագ խաշելուց հետո ցանցկեն գդալով հանեք ջրից եւ դրեք ցանցի մեջ՝ ջրքամվելու: Կարող եք նաեւ տարբեր կաթսաներում խաշել, եթե այդպես ավելի նպատակահարմար եք գտնում:
Պանիրը քերեք խոշոր անցքերով քերիչով: Կանաչիներն ու կանաչ սոխ-սխտորը մանր կտրատեք, ավելացրեք հարած հավկիթների վրա, ինչպես նաեւ՝ սեւ եւ կարմիր պղպեղ ավելացրեք: Եթե թարմ սխտոր չունեք, կարող եք պարզապես 2-3 պճեղ սխտոր մանր կտրատել կամ ճզմել եւ ավելացնել ընդհանուր զանգվածին:
Մեծ թավան դրեք կրակին, ավելացրեք բուսական յուղը: Ջրքամված բանջարեղենը դասավորեք թավայի մեջ, երկու- երեք րոպե տապակվելուց հետո ավելացրեք պանիրն ու կանաչիներով ձուն:
Թողեք մի փոքր տապակվի, ապա վրան շարեք կարագի կտորները: Թեթեւակի շուռումուռ տվեք բանջարեղենը, որ ձուն ամբողջովին եփվի, իսկ կարագը լրիվ հալվի: Մատուցեք տաք-տաք: 
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
